"بايقوڭىر" عارىش ايلاعىنان ۇشاتىن "سويۋز" تيپىندەگى تاسىمالداۋشى زىمىراننىڭ بولىكتەرى تۇسەتىن جەر ءۇشىن رەسەي قازاقستانعا جىلىنا 460 مىڭ دوللار تولەيدى، دەپ حابارلايدى Qamshy.kz  Tengrinews.kz -كە سىلتەمە جاساپ.

مۇنداي سومانى "ناش كوستاناي" باسىلىمىنا قازاقستاننىڭ ينۆەستيسيا جانە دامۋ جونىندەگى ۆيسە-مينيسترى البەرت راۋ ايتىپ وتىر. رەسەيلىكتەردىڭ بۇل تولەمى تاسىمالداۋشى زىمىراننىڭ قانشا بولىگىنىڭ تۇسەتىنىنە بايلانىستى بولمايدى.

"مۇندا ماسەلە بولىكتەردىڭ قۇلاۋ تراەكتورياسىنىڭ وزگەرۋى جايلى بولىپ وتىر. ياعني، بۇرىن بولىكتەر جەزقازعان جاققا قۇلايتىن، ال ەندى اقتوبە وبلىسىنىڭ ىرعىز اۋدانىنىڭ جانە قوستاناي وبلىسىنىڭ جانگەلدى اۋدانىنىڭ تەرريتورياسىنا قۇلايدى. وسى ماقساتقا 63 مىڭ گەكتار جەر ءبولىنىپ وتىر (630 شارشى شاقىرىم - اۆت.): 22 مىڭ گەكتار اقتوبە وبلىسىندا جانە 41 مىڭ گەكتار قوستاناي وبلىسىندا"، - دەدى شەنەۋنىك.

"مەن دەپۋتاتتاردىڭ سۇرانىسى بويىنشا ەكى وبلىستىڭ اكىمدەرىنە حات جازدىم، ولار بولىنگەن قاراجاتتىڭ وبلىستا تۇراقتاپ قالماي، اۋدان بيۋدجەتتەرىنە بەرىلەتىنىن ايتتى، سول جاققا زىمىران قالدىقتارى قۇلايدى. بۇل قاراجات الەۋمەتتىك شىعىندارعا جۇمسالادى. مەن كارتاعا قارادىم، ول جاقتا ەلدى مەكەندەر كوپ ەمەس، سوندىقتان سول اۋدانداردا تۇراتىن ادامدار الەۋمەتتىك مۇقتاجدىققا قاراجات الا الادى"، - دەدى ۆيسە-مينيستر.

البەرت راۋدىڭ ايتۋىنشا، قازىرگى ۋاقىتتا رەسپۋبليكا پارلامەنتىندە رەسەيلىك تاراپپەن قازاقستان تەرريتورياسىنداعى جەر ۋچاسكەسىن قولدانۋعا بەرۋ تۋرالى كەلىسىمدى راتيفيكاسيالاۋ بويىنشا جۇمىستار ءجۇرىپ جاتىر. بۇل ايماقتاردا زىمىران قالدىقتارى 1-1،5 جىلدان كەيىن قۇلاي باستايدى.