پاۆلوردار قالاسىنىڭ تۇرعىندارى ەرلى-زايىپتى يرينا شيەۆچۋكوۆا مەن ۆلاديمير تروششەنكو قازاقستانعا ورالدى. الايدا ءوز بالالارىن تۇركيا كلينيكاسىندا قالدىرىپ كەتۋگە ءماجبۇر بولدى، - دەپ حابارلايدى  Qamshy.kz Baq.kz -كە سىلتەمە جاساپ.

سەبەبى ول ينكۋباتوردا جاتىر. 750 گرامم سالماقپەن تۋعان شاقالاققا، كەم دەگەندە، ەكى كيللوگرام جيناۋ قاجەت. وعان ءۇش ايداي ۋاقىت كەتەدى. وسى قىزمەتى ءۇشىن تۇرىك كلينيكاسىنا 50-60 مىڭ دوللار تولەۋ كەرەك.

بالانىڭ اتا-انالارى - يرينا مەن ۆلاديمير تۇركيادا قالا المادى. سەبەبى تۇراتىن جەرلەرى جانە وعان تولەيتىن اقشالارى جوق. وعان قوسا، كلينيكادا يرينانى وزىنە كورسەتىلگەن مەديسينالىق قىزمەتتەر ءۇشىن 2،5 مىڭ دوللار كولەمىندەگى اقىنى تولەۋگە مىندەتتەدى. وتباسىنىڭ تۋعان-تۋىستارى، دوستارى مەن كومەكتەسۋگە نيەت تانىتقانداردىڭ ارقاسىندا 2 مىڭ دوللارداي اقشا جينالدى. «ەۋرازيا» اتتى ساقتاندىرۋ كومپانياسى 300 مىڭ تەڭگەگە جۋىق اقشانى اۋدارىپ بەردى. ال قازاقستاننىڭ تۇركياداعى ەلشىلىك قىزمەتكەرلەرىنىڭ ارالاسۋىمەن تۇرىك كلينيكاسى ەمدەۋدىڭ قۇنىن 1،5 مىڭ دوللارعا قىسقارتتى. دەگەنمەن، قازىرگى اقشا بالانى الىپ كەتۋگە جەتپەيدى.

يرينا مەن ءۆلاديميردىڭ ايتۋىنشا، ساقتاندىرۋ شارتتارىنا سايكەس، كەم دەگەندە، 10 مىڭ دوللار تولەنۋى ءتيىس. سول سەبەپتى ولار وسى ماسەلە بويىنشا ءتيىستى ورگاندارعا ارىزدانۋدى ويلاپ وتىر. بۇدان بولەك، جاس جۇبايلار قازاقستانداعى بالالار قۇقىقتارى جونىندەگى ۋاكىلى زاعيپا بالييەۆادان كومەك بەرۋدى سۇرايدى. «ءبىز شامامەن ەسەپتەپ كوردىك، وتباسىمىزدىڭ بارلىق پاتەرلەرىن ساتساق تا، ول اقشا بىزگە جەتپەيدى»، - دەدى يرينا.