الماتىدا ارناسىنان اسقان وزەن 150 ءۇيدىڭ اۋلاسىن شايىپ كەتتى. №2 جىلۋ ەلەكتر ستانسياسىنىڭ ماڭىندا ورنالاسقان ءۇش قۇبىردىڭ ەكەۋى قوقىسقا تولىپ، سۋ ۇلكەن قىسىممەن ءوتىپتى. سالدارىنان تومەنىرەك ورنالاسقان ساياجايداعى جۇرتتىڭ اۋلاسى سۋعا تولىپ، كوپىرلەر قيراعان، - دەپ حابارلايدى Qamshy.kz كتك ارناسىنا سىلتەمە جاساپ.

ءقازىر مۇندا ارنايى تەحنيكانىڭ ءوزى ازەر وتەدى. تۇرعىنداردىڭ ايتۋىنشا، جاعدايدىڭ ۋشىعۋى وزەن اڭعارىن جوندەۋدەن كەيىن باستالعان. جاعالاۋدى نىعايتامىز دەگەن شەندىلەر، ءىستى شالا اتقارىپ، ارنانى تارىلتىپ تاستاپتى.

كەشە ءتۇس قايتا قارعالى وزەنى قالانىڭ تومەنگى بولىگىندەگى قوس ساياجاي تۇرعىندارىنىڭ تىنىشتىعىن بۇزدى. ارناسىنا سىيماعان سۋ سىرتقا توگىلىپ، جان-جاققا جايىلعان. بۇعان №2 جىلۋ ەلەكتر ستانسياسىنىڭ ماڭىنداعى ديامەترى 1 مەترلىك ءۇش قۇبىردىڭ ەكەۋى قوقىسقا تولىپ قالۋى سەبەپ بولىپتى. جالعىز قۇبىردان وتكەن لاي سۋدىڭ جىلدامدىعى ارتىپ، جۇرتتىڭ باسپاناسىنا دەيىن كىرگەن.

ابات يبرايموۆ، ساياجاي تۇرعىنى:

– 10 مينۋتقا جەتكەن جوق ءۇيدىڭ ىشىنە سۋ كىرىپ كەتتى.تەحنيكا، جيھازدىڭ  بارلىعىجارامسىز بولىپ قالدى. 2 ساعات بويى ءوز كۇشىمىزبەن ارپالىسىپ كوردىك، ەش ناتيجە شىعارا المادىق. نەگە دەسەڭىز سۋ قاتتى كەلدى!

«تەپلوەنەرگەتيك» پەن «ەنەرگوسترويتەل» ساياجاي بىرلەستىكتەرىندەگى 150 ءۇيدىڭ باۋ-باقشاسى سۋ استىندا قالدى. كىشىگىرىم كوپىرلەر دە قيراپ، جولدار مي باتپاققا اينالعان.

وزەن ارناسىن اباتتاندىرۋ كەزىندە بەتونداۋ جۇمىستارى مەن تەمىر تورلارعا تولتىرىلعان تاستار پايدالانىلعان بولاتىن. جوعارعى جاقتا جاعداي قالىپتى، ءبىراق اعىندى سۋ ەكپىنمەن كەلگەن كەزدە مىنا تەمىر تورلاردىڭ تاس-تالقانىن شىعارىپ، سۋ اۋلالارعا جايىلعان. ارناعا سىيماعان سۋ ساياجاي بىرلەستىگىنىڭ تومەنگى بولىگىندە ورنالاسقان مىنا سايعا جينالۋدا. ساعات ساناپ بۇل جەردەگى جاعداي قيىنداي تۇسكەن. سەبەبى، سايدان شىعار جول تاپپاعان سۋ وسى جەردە تۇراقتاپ، ونىڭ دەڭگەيى كوتەرىلۋدە.

بۇل ساياجايلار 2012 جىلى عانا الاتاۋ اۋدانىنىڭ قۇرامىنا كىرىپ، اكىمدىك ءبىرىنشى كەزەكتە وزەن مەن ارىقتاردى جوندەۋگە كىرىسكەن ەكەن. ءبىراق اتقارىلعان جۇمىس ساپاسى جەرگىلىكتى تۇرعىنداردىڭ كوڭىلىنەن شىقپاي تۇر. 

ولگا پانكوۆسكايا، ساياجاي تۇرعىنى:

-بۇرىن وزەن سەكۋندىنا 11 تەكشە مەرت سۋ وتكىزسە، ءقازىر نەبارى 5 تەكشە مەتر وتەدى. بۇل قۇرىلىس كەزىندە تەحنيكالىق تالاپتاردىڭ ساقتالماۋىنان بولدى. اكىمدىك جۇمىستاردى گيدروتەحنيكادان حابارى جوق ادام جۇرگىزگەنىن مويىنداپ وتىر. قايتا جوندەيمىز دەپ جۇرگەندەرىندە ءبىزدى وسىمەن 8-رەت سۋ باستى.

قازىرگى تاڭدا اپاتتى اۋداندا توتەنشە جاعداي دەپارتامەنتىنىڭ ماماندارى جۇمىس جۇرگىزۋدە. ءبىراق جۇمىلدىرىلعان تەحنيكا مەن قۇتقارۋشىلارى سانىنا قاراعاندا بۇل ۇزاققا سوزىلاتىن سەكىلدى.

تيمۋر تىلەۋبەردييەۆ، الماتى قالالىق قۇتقارۋ قىزمەتىنىڭ ءبولىم باستىعى:

–8 موتوپومپا، 2 ەكسكاۆاتور، 2 ساموسۆال كاماز، 3 ەكيپاج قۇتقارۋشىلار جۇمىس ىستەپ جاتىر. 8 پومپانى 8 ۇيگە قويدىق، ۇيلەرىنە سۋ كىرۋى مۇمكىن جەرلەرگە. ال قالعان اۋلالار كەزەكپەن الىنادى.

موتوپومپاپەن سورىلعان سۋدىڭ ورنىن نوسەر جاۋىن بۇرىڭعى دەڭگەيگە قايتا كوتەرۋدە. ال قۇم تولتىرىلعان قاپتار مەن ۋاقىتشا بوگەتتەر ويداعىداي ناتيجە بەرمەي وتىر. جاقىن ماڭدا تۋىستارى بار جۇرت سول جاققا كوشسە، كەيبىرەۋلەر ءتىلسىز جاۋمەن كۇرەسۋ ءۇشىن باسپاناسىندا قالعان. ال اۋا-رايىن بولجاۋشىلار جاقىن كۇندەرى جاۋىننىڭ جالعاساتىنىن حابارلادى. سوندىقتان الماتى مەن ونىڭ ماڭايى قايتادان سۋ استىندا قالۋ ءقاۋپى ساقتالۋدا.