وسكەمەندە 17 جاستاعى جىگىت عاشىقتار اللەياسىندا ەرتىس وزەنىنە قۇلاپ كەتىپ، قايتىس بولدى. قايعىلى وقيعا 5 شىلدەدە ءتۇس الەتىندە بولعان، - دەپ حابارلايدى Qamshy.kz Tengrinews.kz -كە سىلتەمە جاساپ.

كۋاگەرلەردىڭ ايتۋىنشا، ءجاسوسپىرىم وزەننىڭ ماڭىندا سەلفي ءتۇسىرۋ ءۇشىن پەرميتين كوشەسى اۋماعىنداعى جاقتاۋعا شىعىپ العان. سودان ول سۋعا قۇلاپ، قاتتى اعىنمەن سۋعا باتىپ كەتكەن.

شىعىس وڭىرلىك اەروموبيلدى جەدەل قۇتقارۋشىلار جاساعى جۋرناليستەرگە ازىرشە سۇڭگۋىرلەردىڭ دەنەنى تەك كوزبەن شولىپ ىزدەي الاتىنىن ايتتى. سەبەبى، مۇنداي سۋدىڭ قاتتى اعىنىندا دەنەنى وزەننىڭ ىشىنەن ىزدەۋگە تىيىم سالىنعان.

سونىمەن قاتار، باسىلىمىنىڭ مالىمەتىنشە، WhatsApp قولدانۋشىلارى ءجاسوسپىرىمنىڭ سۋعا قۇلاپ كەتكەن ءساتى ءتۇسىپ قالعان دەلىنگەن ۆيدەونى تاراتىپ جاتىر. ۆيدەودان جاس جىگىتتىڭ ەرتىس وزەنىنە كيىمىمەن سەكىرگەنى كورىنەدى. بىرنەشە مەتر ءجۇزىپ وتكەن جىگىت باتىپ كەتپەس ءۇشىن قورشاۋدى ۇستاپ قالماق بولعان. الايدا، ول قورشاۋعا جەتە الماي، ايعايلاي باستاعان. ال ۆيدەونى ءتۇسىرىپ جاتقان وپەراتور جان-جاعىنداعىلاردان كومەك سۇراعان. ۆيدەودان جىگىتكە وزەن جاعاسىنا قاراي ءجۇزىپ كەل دەگەن داۋىستار ەستىلەدى. ال ول بولسا ايعايلاپ جاتتى. وسىدان كەيىن ۆيدەو ءۇزىلىپ كەتەدى.

ايتا كەتەيىك، بۇل روليكتىڭ وسى قايعىلى وقيعاعا قاتىسى بار ما، جوق پا - ازىرشە بەلگىسىز. باسىلىمنىڭ مالىمەتىنشە، قۇقىق قورعاۋ ورگاندارىنان وسى وقيعاعا قاتىستى تۇسىنىك بەرىلمەگەن. سونداي-اق، ۆيدەو كادرلارىنان جىگىتتىڭ قولىندا تەلەفون كورىنبەيدى. سوندىقتان ونىڭ سەلفي تۇسىرگەنى تۋرالى مالىمەت ءالى زەرتتەلەدى.