تابيعاتتىڭ توسىن مىنەزىنەن ءتورت تۇلىك مال قىرىلىپ جاتىر. وڭتۇستىك قازاقستان وبلىسىندا نوسەرلى جاۋىننان وزەن سۋى ارناسىنان اسىپ، ءبىر تابىن جىلقىنى اعىزىپ كەتتى. وقىس وقيعا ءال-فارابي اۋدانىنداعى تەكەسۋ اۋىلىندا بولعان. ءقازىر قۇتقارۋشىلار ارام قاتقان جىلقىلار جاعالاۋعا شىعارىلىپ، جالپى شىعىن كولەمى ەسەپتەۋدە، - دەپ حابارلايدى Qamshy.kz كتك ارناسىنا سىلتەمە جاساپ.

شەلەكتەپ قۇيعان جاۋىن وڭتۇستىكتىڭ تۇرعىندارىن شاش ەتەكتەن شىعىنعا باتىردى. كەشە كۇندىز باستالعان نوسەر جاۋىننىڭ ارتى بۇرشاققا ۇلاسىپ، تەكەسۋ اۋىلىنىڭ ماڭىنداعى وزەن سۋى ارناسىنان اسىپ كەتكەن. سونىڭ سالدارىنان جايىلىمدا جۇرگەن ءبىر ءۇيىر جىلقى مەن ءىرى قارا سۋعا كەتتى. ياعني نايزاعايدىڭ جارقىلىنان شوشىعان جانۋارلار جان-جاققا بىتىراي قاشىپ، سۋ قويماسىنا قۇلاپ كەتكەن. 

باقىت اسامبايەۆ، جىلقىشى:

ء-ىنىم ەكەۋمىز ەدىك قايتارا المادىق. بۇرشاقتان جەل قاتتى بولىپ كەتتى. 10-15 مينۋتتا دالا قاپ قارا بولىپ كەتتى عوي. يە بولا المادىق.

ءقازىر قۇتقارۋشىلار ارام قاتقان ولەكسەلەردى سۋدان شىعارىپ جاتىر. تابيعاتتىڭ توسىن مىنەزىنەن بارلىعى 17 باس جىلقى، ەكى سىيىر مەن ۇساق مال قىرىلعان. ەندى ونىڭ وتەماقىسىن كىمنىڭ تولەيتىنى بەلگىسىز. ءتىپتى اۋىل تۇرعىندارىمەن كەزدەسكەن اتقامىنەرلەر دە ازىرگە ماردىمدى جاۋاپ بەرە الماي وتىر. 

باۋىرجان قالجان، ءال-فارابي اۋدانىنىڭ اكىمى:

-توتەنشە جاعدايعا بايلانىستى ارنايى كوميسسيا قۇرىلادى. ولار اپاتتىڭ ناقتى سەبەبىن انىقاتۋى ءتيىس. تەك سودان كەيىن عانا وتەماقى تولەۋ ماسەلەسىن قاراستىرامىز.

اياق استىنان باستالعان جاۋىن اۋىلدىڭ دا استاڭ كەستەڭىن شىعارعان. ياعني دۇلەي داۋىل مەن بۇرشاقتان اعاشتار قۇلاپ، گاز قۇبىرلارى ءبۇلىندى. سوندىقتان اۋدان باسشىلارى ءقازىر شىعىن كولەمىن ەسەپتەپ، ارام قاتقان ءىرى-قارانىڭ ولەكسەلەرىن جويۋمەن اينالىسىپ جاتىر.