ورالدىقتار قانتتى ەندى تەك تۇسىندە عانا كورەتىن بولعان. ويتكەنى ءبىر جەتىدەن بەرى وڭىردەگى ساۋدا ورىندارى مەن دۇكەن سورەلەرىندە شەكەر اتىمەن جوق. ءتاتتى ءونىم كەي جەرلەردە بولعانىمەن باعاسى اسپانداپ كەتكەن. ەڭ قاجەت ماۋسىمدا قۇمشەكەردىڭ قول جەتىمسىز بولۋى جۇرتتى اشىندىرىپ وتىر، - دەپ حابارلايدى Qamshy.kz كتك ارناسىنا سىلتەمە جاساپ.

ورالدىقتار ءبىر اپتادان بەرى بابىن كەلتىرىپ ءشاي ىشە الماي ءجۇر. سەبەبى وڭىردەگى دۇكەن سورەلەرىندە شەكەر تاپشى.

سۆەتلانا لەبەديەۆا، دۇكەن اكىمشىسى:

-قانت قولدا جوق. قىمباتتاۋىنا بايلانىستى تاسىمالداۋشىلار فيرمالاردا دا جوق دەيدى. 

كوتەرمە ساۋدا ورىندارى دا جۇتاپ وتىر. جۋىق ارادا بولعان كۇننىڭ وزىندە، باعاسى اسپانداپ كەتەرى ايتپاسا دا تۇسىنىكتى. كەيبىر بازارلار مەن ءىرى ساۋدا ورىندارىندا قانت بولعانىمەن، كوپ الۋعا شەكتەۋ قويىلىپتى. 

مەرگەن جۇمالييەۆ، ساتۋشى:

-بەس كەلى ارى كەتسە ون كەلى عانا شەكەر بەرىلەدى. ايتۋلارىنشا قويمادا قانت جوق. بۇنىڭ سوڭى قىمباتشىلىققا اكەپ سوعۋى مۇمكىن. البەتتە وعان حالىق نارازى.    

ءتاتتى ءونىم ەڭ قاجەت كەزدە كوزدەن بۇلبۇل ۇشتى. ءقازىر ەلدىڭ جەمىس-جيدەكتى جيىپ، قىسقا قامداناتىن شاعى. سوندىقتان بۇقارا شەكەردىڭ باعاسى قانشا اسپانداسا دا ونى الاۋعا دايار. الايدا، جۇرت قانت تاپپاي تەنتىرەپ ءجۇر. 

نادەجدا ستانسكوۆا، ورال قالاسىنىڭ تۇرعىنى:

ء-قايبىر جىلدارى وسىنداي بولعان. بۇل ەندى شەكتەن شىققاندىق. ءقازىر ءونىم جيناپ، قىسقا ازىرلەنەتىن كەز. ءدال وسى كەزدە قاسارىسقانداي قانت جوعالىپ كەتەدى. قىمبات باعاعا تا تابا المادىم.

ورالدا جىلدا جاز ماۋسىمىندا شەكەر تاپشىلىعى سەزىلىپ، ارتىنشا ونىڭ باعاسىنىڭ ءوسۋى ادەتكە اينالعان دەيدى تۇرعىندار. وسىعان دەيىن ءبىر كەلى قانت 235 تەڭگە بولسا، ءقازىر 300 تەڭگەگە ءبىر-اق كوتەرىلىپتى.