الماتى وبلىسىنىڭ اقشي اۋىلىندا جەكە ۇيلەردىڭ ءبىرىنىڭ اجەتحاناسىندا تابىلعان نارەستەنىڭ اناسى ۇستالدى، - دەپ حابارلايدى Qamshy.kz Tengrinews.kz -كە سىلتەمە جاساپ. 

اناسى 1992 جىلعى قىز بولىپ شىقتى. "ول قاراساي اۋدانىندا تىركەلگەن. ول بوسانعان ۇيگە قوناق بولىپ كەلىپ جۇرگەن. ءۇيدىڭ يەلەرى - ونىڭ تۋىستارى. 2 جىل بۇرىن وسىنداي قىلمىس جاساعان. سول ۋاقىتتا بالا شەتىنەپ كەتكەن. بۇل انىقتالادى. تەرگەۋ ءجۇرىپ جاتىر"، - دەپ حابارلادى وبلىستىق ءىىد وكىلدەرى.

ەسكە سالايىق، الماتى وبلىسى ىلە اۋدانى اقشي اۋىلىنداعى ءۇيدىڭ اجەتحاناسىنان جاڭا تۋعان نارەستە 5 شىلدەدە تابىلعان ەدى. 

كۋاگەردىڭ ايتۋىنشا، قىزدىڭ سالماعى 3،3 كەلى. "كەيبىر مالىمەتتەرگە سۇيەنسەك، قىز اجەتحانانىڭ ىشىندە تۋعان. نارەستەنى ءتورت مەترلىك شۇڭقىردان الىپ شىقتى"، - دەدى كۋاگەر. ونىڭ ايتۋىنشا، قىز 4 شىلدەدە تاڭعى ساعات 7-دە تابىلعان. "ءۇيدىڭ قوجايىنى ايەلدى كورمەپتى. ول تاڭعى ساعات 7-دە نارەستەنىڭ جىلاعانىن ەستىپ، سىرتقا شىققان. سودان جەدەل جاردەم قىزمەتكەرلەرىن شاقىرىپ، نارەستە جەرگىلىكتى اۋرۋحاناعا جەتكىزىلدى. كەيىننەن وقيعا ورنىنا پوليسەيلەر كەلىپ، قىز وبلىستىق اۋرۋحاناعا جەتكىزىلدى"، - دەدى كۋاگەر.

وبلىستىق بالالار اۋرۋحاناسى ەمدەۋ ءىسى ديرەكتورىنىڭ ورىنباسارى ارمان تويبەكوۆتىڭ ايتۋىنشا، نارەستەنىڭ جاعدايى قالىپتى. "قىزعا ازداپ سۋىق تيگەن، ءبىراق دەنە تەمپەراتۋراسى قالىپتى. اۋرۋحانادا تاعى 10 كۇندەي ەم الادى"، - دەدى دارىگەر.