استانانىڭ ميلليونشى تۇرعىنى بولىپ ومىرگە كەلگەن سايدا ەسىمدى ءسابي قازنەتتە كوپ تالقىلاندى. وسىدان كەيىن جۇرتشىلىق الماتىنىڭ ميلليونىنشى تۇرعىنى بولعان بالانى ەسكە الا باستادى.
وسىلايشا استانانىڭ ميلليونىنشى تۇرعىنى الماتىنىڭ ميلليونىنشى تۇرعىنىن ەسكە ءتۇسىردى. سونىمەن ول كىم ەدى؟
باۋىرجان داۋلەت ۇلى قادىرسىزوۆ 1981 جىلى 19 جەلتوقساندا ءتورتىنشى پەرزەنتحانادا قۇرىلىس سالاسىندا ەڭبەك ەتەتىن داۋلەت جانە گۇلنازيا قادىرسىزوۆتاردىڭ وتباسىنا دۇنيەگە كەلگەن. وسىناۋ قۋانىشتى ساتكە بايلانىستى قازاقتىڭ داڭقتى باتىرى باۋىرجان مومىش ۇلى وتباسىنا ىزگى تىلەگىن بىلدىرگەن بولاتىن:
الماتىنىڭ ميلليونىنشى تۇرعىنى بولعان باۋىرجانعا قازاقتىڭ داڭقتى باتىرى باۋىرجان مومىش ۇلىنىڭ ءوزى باتاسىن بەرگەن.
«باۋىرجان دەپ اتىن قويعان سابيگە باتامدى بەرەمىن. دەنى ساۋ، ناعىز جىگىت بولىپ ءوسسىن. ۇلى وتانىمىزدىڭ مىقتى ازاماتى بولۋىنا شىن جۇرەگىممەن تىلەكتەسپىن»، – دەگەن ەدى باتىر.
ومىرگە كەلگەن ۇل بالاعا سول كەزدە «الماتى قالاسىنىڭ ميلليونىنشى تۇرعىنى» دەگەن القا تاعىلىپ، قالانىڭ سيمۆوليكالىق كىلتى تابىس ەتىلگەن.
باۋىرجان ءوزىنىڭ ميلليونىنشى تۇرعىن بولعانىنان ازداپ قىسىلاتىن جىگىت جۇرتقا جاريا ەتە بەرمەيدى ەكەن.
«مەن قاراپايىم جىگىتپىن، قاراپايىم كۇن كورەمىن، ەشقانداي سىي-قۇرمەتتى تالاپ ەتپەيمىن. مەنى سۇيىكتى قالامنىڭ ميلليونىنشى تۇرعىنى رەتىندە ەمەس، وسى قالپىممەن قابىلداعاندارىن قالايمىن. ال قالانىڭ كىلتىنە كەلەر بولساق، ول الماتىداعى 28 گۆاردياشى-پانفيلوۆشىلار مۋزەيىندە ساقتاۋلى»، – دەيدى باۋىرجان قادىرسىزوۆ.
سونداي-اق، الماتىنىڭ ميلليونشى تۇرعىنى قونايەۆقا ساحنادان تۇرىپ ولەڭ وقيتىنىن، ومىرىندە گازەتتەرگە دە، تەلەارنالارعا دا كوپ سۇحبات بەرگەنىن، ءتۇرى شارالارعا قاتىسقانىن، كوبىنە وزىنە باتىردىڭ ەسىمى بەرىلگەندىكتەن باۋىرجان مومىشۇلىمەن بايلانىستى شارالارعا قاتىسقانىن ەسكە الدى.
ءالىبي جانە ءاليحان ەسىمدى ەكى ۇل تاربيەلەپ وتىرعان الماتىنىڭ ميلليونشى تۇرعىنى باۋىرجان قادىرسىزوۆ استانانىڭ ميلليونشى تۇرعىنى بولعان سايدا ەسىمدى سابيگە باقىت تىلەدى.
-سايدا ەڭ باقىتتى، سۇلۋ ءارى اقىلدى قىز بولعانىن تىلەيمىن. ول بارلىعىنا ۇلگى بولسىن، ويتكەنى ول – ەلوردانىڭ بەينەسى. ال قىز بالا قاشاندا مەيىنباندىقتىڭ، قامقورلىقتىڭ ۇلگىسى سانالادى، - دەدى ول.
