استانا كۇنىنە وراي ەلوردادا وتكەن "باعانالى وردام-باستى وردام" اتتى ايتىستا بولاتبەك ورازبايەۆتىڭ ايبەك قالييەۆپەن ايتىسىندا ايتقان ءبىر قايىرىمى ەدى. ءۇزىندىسىن ۇسىنامىز.
قاراشا ۇيدە شانشىعان قارا ۋىقتى،
دانىشپاندار تۋدىرعان دالا قۇتتى.
الاش-الاش، الاشا-حان بولعالى،
تاريحتان تالاي تارماق تارالىپتى.
سونىڭ ءبىرى ءبىر كەزدە وتىراردا،
ەل ءىشىن داۋ، ەل شەتىن جاۋ الىپتى.
شىڭعىس حان اسكەرىمەن شابۋىلداپ،
حالىققا ءتوندىرىپتى قارا بۇلتتى.
ەكى ءجۇز مىڭ اسكەرمەن التى اي بويى،
الا الماي جان بەرىسىپ، جان الىپتى.
قاپتاعان قالىڭ قولعا قارسى تۇرىپ،
قايىرحان كورسەتىپتى دانالىقتى.
ەل ىشىنەن ءبىر ساتقىن ەسىكتى اشىپ،
جاۋ اسكەرى جەبەدەي قادالىپتى.
شەگىرتكەدەي قاپتاعان قالىڭ قولعا،
قاراشا ەل قىرعاۋىلداي تالانىپتى.
قانشاما كىتاپحانا وتقا ورانىپ،
قازىناسى حالقىمنىڭ تونالىپتى.
وسىنداي ساتقىنداردىڭ كەسىرىنەن،
وتىرار جەر بەتىنەن جوعالىپتى.
سودان بەرى سان عاسىر سىرعىپ ءوتىپ،
زىمىرعان زامانا جاڭارىپتى.
شاپقىننان ەسەن قالىپ ەس جيعاندا،
ەستىدىك جەر تۋرالى جاڭالىقتى.
ساتقىندار ءالى دە بار ەل ىشىندە،
قازاقپىن دەپ بىلعانعان ارالىقتى.
سوندىقتان ساۋىسقانداي ساق بولماساق ،
سان سوقتىرىپ كەتپەكشى ءتامام ۇلتتى
قايىرحاننىڭ قولىندا قايران بار ما؟
قاراشوقى جۇرگەندە قارا مۇرتتى.
بولاتبەك ورازبايەۆ
