شىلدەنىڭ ورتاسى بولسا دا قاۋىن-قاربىز جەۋگە ءالى ەرتە. سەس ماماندارى وسىلاي دەپ دابىل قاعىپ جاتىر، - دەپ حابارلايدى Qamshy.kz 31 ارناعا سىلتەمە جاساپ.
ايتۋلارىنشا، قاربىزداردىڭ قۇرامىنداعى ۋلى نيتراتتاردىڭ مولشەرى تىم كوپ. ال جول جيەگىندەگى ساتىلىپ جۇرگەندەرى ءتىپتى ءقاۋىپتى. بۇل ورىندارداعى تاۋارلار تازالىق تالاپتارىنا مۇلدەم ساي كەلمەيدى دەدى.
قاربىزعا تولعان مىنا دۇڭگىرشەك بىرنەشە جىلدان بەرى وسى جەردە تۇرعان. كاسىبىنەن ءناسىپ تاۋىپ كەلگەندەر، بۇل جەردە رۇقساتسىز ساۋدا جاساعان. تەكسەرىس كەلەدى دەگەندى الدىن الا ەستىدى مە، ايتەۋىر قويجايىندارى بۇل جەردە توبە كورسەتپەدى. ال پارمەنى كۇشتىلەر تاۋاردىڭ يەسىن كۇتپەي، قۇرامى «ءقاۋىپتى» قاربىزداردى تيەپ الىپ، دۇڭگىرشەكتەردى بۇزىپ تاستادى.
اسىعىس قيمىلداعان ارنايى جاساق جول جيەگىندە جەمىس جيدەكپەن كوكونىس ساتىپ تۇرعان بىرنەشە نۇكتەگە توقتادى. ساۋداگەرلەردىڭ سۇسىن قاشتىرعان قۇزىرلىلار ەشكىمدى دە اياماي ءبارىن قاتاڭ جازالادى.
الايدا اعالارى كەلمەدى بۇل جىگىتتىڭ. تاۋارى تۇگەل تاركىلەنىپ الىندى. اكىمشىلىك پەن سەس ماماندارى بىرىگىپ جۇرگىزگەن رەيد ناتيجەسىندە جالعىز بۇل جىگىتتىڭ ەمەس، كوپتەگەن ساتۋشىلار تاراپىنان بىرنەشە زاڭ بۇزۋشىلىقتار انىقتالدى. ساتىپ تۇرعان تاۋارلارىنىڭ ساپاسىنا دا كۇمان كەلتىردى ماماندار.
مەرۋەرت قاسىموۆا، الماتى قالاسى تققد باس مامانى:
- ينفەكسيالىق اۋرۋلار جۇقتىرىپ الۋىڭىز مۇمكىن. گاستروەنتروكوليت، سالمانەلەز، ءتۇرلى توكسيكالىق ينفەكسيالار تارالادى. ساۋداگەرلەر تازالىقتى مۇلدەم ساقتامايدى. جول جيەگىندە تۇرىپ، بۇكىل شاڭ-توزاڭ، كولىكتەردىڭ ۋلى گازدارى وسىلارعا ءسىڭىپ كەتەدى.
قاۋىن قاربىز وزگەدە جەمىس جيدەكتى ءالى جەۋ ەرتە. ويتكەنى قۇرامىندا نيتراتتاردىڭ مولشەرى شامادان تىس. ناعىز قاربىزدار تەك شىلدەنىڭ اياعى مەن تامىز ايلارىنىڭ باسىنا قاراي پىسەدى ەكەن. بولماسا ۇلكەن دۇكەندەردەن ساتىپ العان ءجون. ال دەنساۋلىققا زيانى بولماسىن دەسەڭىز، جول جيەگىندەگى جابايى ساۋداعا مۇلدەم جولاۋدىڭ قاجەتى جوق دەيدى ماماندار.
