اقتوبە قالاسىنىڭ №2 سوتىندا سيرياعا اتتانباق بولعان 12 اقتوبەلىككە قاتىستى ۇكىم شىقتى، - دەپ حابارلايدى Qamshy.kz Tengrinews.kz  -كە سىلتەمە جاساپ.

ولاردىڭ ەڭ كىشىسى 20 جاستا، ۇلكەنى 57-دە. سوت ۇكىمىمەن ولار اۋىر قىلمىس جاسادى دەپ تانىلدى، ناقتىراق ايتقاندا لاڭكەستىك توپتىڭ قىزمەتىنە نەمەسە ونىڭ جاساپ جاتقان تەرروريستىك اكتىلەرىنە قاتىسۋعا وقتالۋ، لاڭكەستىك جانە ەكسترەميستىك قىزمەتىن قارجىلاندىرۋ جانە تەرروريزمگە نەمەسە ەكسترەميزمگە استىرتىن دەم بەرۋشىلىك جاسادى دەپ تانىلدى. سوت ۇكىمىمەن 12 ادام كىنالى دەپ تانىلىپ، 6 جىلدان 8 جىلعا دەيىن باس بوستاندىعىنان ايىرىلدى. ولاردىڭ مۇلكى تاركىلەنەدى.  

اقتوبە، اقمولا، قىزىلوردا وبلىستارىنىڭ تۇرعىندارى سيرياعا بارىپ، دايش لاڭكەستىك ۇيىمىنىڭ قۇرامىندا قارۋلى قاقتىعىستارعا، سونىمەن قاتار ولار جاساپ جاتقان اكتىلەرگە قاتىسپاق بولعان. ولار ءوز جوسپارىن جۇزەگە اسىرۋ ءۇشىن لاڭكەستىك ۇيىمنىڭ مۇشەلەرىمەن ينتەرنەت ارقىلى بايلانىسقا ءتۇسىپتى. بۇل ماقساتتا ولار وزبەكستان مەن قىرعىزستان ازاماتتارىنىڭ اتىنا قولدان كۋالىك جاساعان. سونىمەن قاتار، سوت ءبىر سوتتالۋشىنىڭ ولارعا قارجىلاي كومەك كورسەتكەنىن انىقتادى. 

ەسكە سالايىق، بيىل 19 اقپاندا اقتوبەدە ءدىني ەكسترەميستىك توپتىڭ 12 مۇشەسى ۇستالعان بولاتىن. وبلىستىق پروكۋراتۋراداعىلاردىڭ ايتۋىنشا، ولار سيرياعا بارىپ، قارۋلى قاقتىعىستارعا قاتىسپاق بولعان. ولاردىڭ ىسىنە بايلانىستى سوتقا دەيىنگى ءوندىرىس باستالعان ەدى.