الماتى قالالىق ءىىد باسشىسى سەرىك كۇدەبايەۆ Instagramدا ەسىرتكىنىڭ جانە ينە سالىنعان قولدىڭ سۋرەتى بار كونتەنتتى انىقتاۋدى تاپسىردى، - دەپ حابارلايدى Qamshy.kz Tengrinews.kz -كە سىلتەمە جاساپ.

قالالىق ءىىد رەسمي وكىلى سالتانات ازىربەكتىڭ ايتۋىنشا Instagram قولدانۋشىسىنىڭ ماتەريالدارىن پوليسەيلەر زەرتتەپ جاتىر. 

"باسشىلىقتىڭ تاپسىرماسىمەن اتالعان قىزدىڭ Instagram الەۋمەتتىك جەلىسىندەگى مالىمەتتەردى تەكسەرۋ جانە زەردەلەۋدى الماتى قالاسىنىڭ ىشكى ىستەر دەپارتامەنتىنىڭ جەدەل ارەكەت ەتۋ بولىمىنە تاپسىرىلعان. تەكسەرىس قورىتىندىسى بويىنشا قۇقىقتىق باعا بەرىلەدى. ەگەر قولدانۋشى ەسىرتكى قابىلداپ، ونى الەۋمەتتىك جەلىدە جاريالاعان بولسا، وندا ول ادام جازالاناتىن بولادى"، - دەدى ازىربەك. ونىڭ ايتۋىنشا تەكسەرىس قورىتىندىسى بويىنشا جۇزدەگەن ادام شاعىمدانعان قىزدىڭ ارەكەتى ەسىرتكىنى ناسيحاتتاۋ بولىپ تابىلا ما، جوق پا دەگەن ماسەلەگە قاتىستى شەشىم شىعارىلادى.

ايتا كەتەيىك، قىزدىڭ ءوزى اشىق تۇردە ەسىرتكى قابىلدايتىنىن مويىنداپ، الەۋمەتتىك جەلىگە ينەلى شپريسپەن ەكپە سالىنعان قولدى جۇكتەگەن. اككاۋىنتىندا قىز ءوزىنىڭ ءتارتىپسىز ەكەنىن جانە الماتىداعى كلۋبتارعا ءجيى باراتىنىن جازادى.