استانا كۇنىنە وراي ەلوردادا وتكەن "باعانالى وردام-باستى وردام" اتتى ايتىستا بولاتبەك ورازبايەۆتىڭ ايبەك قالييەۆپەن ايتىسىندا ايتقان ءبىر قايىرىمىنان كەلەسى ءۇزىندىنى ۇسىنامىز.
اينالايىن ايەكە،
جاستارعا ارتساڭ سەنىمدى
جىرلاۋدان نەسىن ارلانام،
قازاقتى جىرلاپ بەرەيىن.
اعاجان قۇلاق سال ماعان
ماڭعىستاۋ مەنىڭ ماڭ دالام.
سارىارقام مەنىڭ سارى دالام،
كوسىلىپ جاتقان كوك تەڭىز
قازىناسى مول قارت كاسپيي
ورتايماعان قاۋعادان.
اساۋ تولقىن اق جايىق
اسىپ تاسقان ارنادان .
سۇلۋ كوكشە سەكسەن كول،
اق ورداسىن تىكتەگەن.
ابىلايداي حان بابام
ۇلىتاۋ ۇلى مەكەنىم.
ءانى كەتپەگەن تورىنەن
ءدانى كەتپەگەن قامبادان.
التىن وردام استانام
كوك بايراعى جەلبىرەپ،
كوگىندە قىران سامعاعان.
التىن باسقان باۋىرىنا
تارباعاتاي التايدىڭ
تابيعاتىنا تاڭدانام.
جەرىندە بار جەتى وزەن
جەرۇيىعىم جەتىسۋ،
كوركى كوزدى ارباعان.
ايبارى بيىك الاتاۋ
قاراعان ادام شىڭىنا،
قالپاعى تۇسپەي قالماعان.
قايعى كورگەن قاراتاۋ
تاريحىن تانىپ بىلەسىڭ،
تاسىنا تۇسكەن تاڭبادان.
قازىعى جۇرتتىڭ قازىعۇرت
باسقادان ارتىق بار باعاڭ.
ەجەلگى قونىس تۇركىستان،
ەكى دۇنيەنى جالعاعان.
استانام بولعان اقمەشىت،
اتاقتى اسان قايعىنىڭ
اتانى شوگىپ اۋناعان.
ەلباسى ءبىر كەز شەكارا
بولماعان دەپ قازاقتا.
استارلى ءسوزىن ارناعان
تۇيسىكگى تومەن كەي جاندار،
تۇسىنبەي جاتىپ تالداعان.
ارىدان تارتىپ ايتايىن
استارىن كىم بار اڭداعان.
جۇمىر جەردىڭ بەتىندە
توپىراق جوق قازاقتىڭ،
تابانى ءتيىپ بارماعان،
ەدىل بوپ تۇرعان شاعىمدا
ەۋروپانى جاۋلاعام.
تۇلپارى تاپتاپ تۇركىنىڭ
شام دالاسىن شاڭداعان.
باعداتتى بيلەپ قوس عاسىر
باسىنا سالدىم زار زامان.
ماعولستان بوپ تۇرعاندا
ءۇندىستان پاكىستاندى دا
بيلىگىمدە ۇستاپ بارلاعام.
اۋعانىستاننىڭ جەرىن دە
ۋىسىمدا قارماعام.
قان قۇستىردىم كاۆكازعا
قامالىم بار ما الماعان.
بەيجىندى شاپقان بۇل قازاق
بۇعالىق كىمگە سالماعان.
بايقادىڭدار عوي اعايىن،
ءبارى بىزدىكى بولعان سوڭ.
ەلباسى ءوزى ايتقانداي
شەكارا بىزدە بولماعان.
ۇشىندا تۇرعان نايزامنىڭ،
ۇشى قيىرسىز بار عالام.
ايتىپ ايتپاي نەمەنە
شەكسىز دە شەتسىز الەمدى،
قينالماي قازاق شارلاعان.
وسىلاردىڭ بارلىعى
بولسا دا ءقازىر تۇگەلدەي،
قانجىعامدا قالماعان.
تەڭدىگىمدى العالى،
تۇراعىم ءبۇتىن تاڭداعان.
باياندى قىلسىن ءاردايىم
باعىمدى باسقا ورناعان.
قوس مۇشەلگە كەلگەن ەلىمدى
قوس دۇنيەدە باقىتتى ەت
بار تىلەگىم سول اللادان.
استانا سەنى جىر ەتسەم،.
ءقادىرى بيىك حان ءتورىم
اقيىق قىپ سەنى تۇلەتكەن
الاتاۋداعى قارت ەلىم.
اقىڭىڭدى ەندى تىڭداساڭ،
ايتاتىن ساعان بار ءسوزىم
جاھاندى تاڭداي قاقتىرعان.
جاقسىلىققا اركەز جارشى ەدىڭ
اس بەرەسىڭ استا توك.
التىنشى اي سايىن اعىلىپ
اقىنىڭ مەنەن سال سەرىڭ
شەتەلدەن نەبىر ءانشىنى
ات جىبەرىپ الدىرىپ.
اتان سويىپ قالدىرىپ
تارقاتامىن دەپ جان شەرىن،
جارىلقاعان جات جۇرتتى.
جانى جومارت ءمارت ەدىڭ
شاپان جاۋىپ سولارعا
سايگۇلىگىڭدى مىنگىزدىڭ.
ساۋىرى جازىق سالپى ەرىن
قانشا تويلاساڭ ءوزىڭ ءبىل،
قارجىنىڭ ورىنىن جابام دەپ
حالىقتىڭ سىقپا قان ءسولىن
ەشكى كەمىرىپ كەتكەن سوڭ
تال كورەدى تالكەگىن
سىلتەنبەسە ەكەن ەلىمە
سەندەگى دىراۋ قامشى ءورىم.
جايلى بول جۇرتقا اقوردا
جەتى جارعىسىنداي تاۋكەنىڭ
تىزگىنىن ۇستاپ بۇل جۇرتتىڭ،
توردە وتىر قاسقا قىل مىقتىم
كىندىگىنە قادا قاققانبىز.
ازياداي الىپ قۇرلىقتىڭ
حالىققا سىيلاپ قۋانىش،
تاريحقا تامىر سۇڭگىتتىڭ.
العا تارتىپ كەلەسىڭ
ارباسىن سۇيرەپ تىرلىكتىڭ.
اتتانار ساتتە ءسوزىم سول
استاناسى ءوزىڭ بول
اقيقات پەن شىندىقتىڭ
بەرەكە مەن بىرلىكتىڭ
اقىنىڭنىڭ وسى تىلەگى
ەڭسەلى جۇرتى بولعايسىڭ
ەكى مىڭىنشى جىلدىقتىڭ.
بولاتبەك ورازبايەۆ
