استانادا ەكى جىگىت قالاداعى ەڭ ۇلكەن كوپىردىڭ ۇستىنە ورمەلەپ كەتتى. ولاردىڭ بيىكتىكتەن ءتۇسىپ كەلە جاتقانىن تۇرعىنداردىڭ ءبىرى بايقاپ، ۇيالى تەلەفونعا ءتۇسىرىپ العان، - دەپ حابارلايدى Qamshy.kz كتك ارناسىنا سىلتەمە جاساپ.
-جۇرەك جۇتقان جىگىتتەر عوي. نەلەرى بار دەسەيشى؟ ارعى جاعىنان ءمىندى، بەرگى جاعىنان ءتۇسىپ جاتىر...
تاسپادا جاس جىگىتتەردىڭ كوپىرگە قاۋىپسىزدىك بەلدىگىنسىز شىعىپ كەتكەنى انىق كورىنەدى. كۋاگەرلەردىڭ ايتۋىنشا، ەكەۋى ادرەنالين ءۇشىن بيىككە ورمەلەگەن. الايدا، قىزىق قۋعاندار كەز-كەلگەن ساتتە تومەنگە قۇلاپ كەتۋى ابدەن مۇمكىن ەدى. ءقازىر استانالىق پوليسەيلەر تەنتەكتەردىڭ ءاتى-جونىن انىقتاۋدا. بۇزاقىلارعا 20 مىڭ تەڭگەدەن استام ايىپپۇل سالىنۋى مۇمكىن.
ايتا كەتۋ كەرەك، ەسىلدىڭ وڭ مەن سول جاعالاۋىن بايلانىستىرىپ تۇرعان بۇل كوپىرگە كوبىنە ادامدار وز-وزىنە قول جۇمساۋ ءۇشىن ورمەلەيدى. جۋىردا 36 جاستاعى تاجىكستان ازاماتى قولىنا پىشاق الىپ، ءدال وسى كوپىردەن سەكىرىپ ولمەك بولعان. جارتىلاي جالاڭاشتانعان ابدۋللا رۋزەيەۆتى ەلشىلدىكتەگىلەر مەن پوليسەيلەر كەلىپ، ارەڭ امان الىپ قالعان ەدى.
