ءۇيى سوت شەشىمىمەن ءسۇرىلۋى ءتيىس استانالىق ادىلبەك مەيراموۆقا ءۇش بولمەلى پاتەر بەرىلگەن. ال، بۇرىنعى باسپاناسى سوت شەشىمىنە ساي ءسۇرىلدى،  - دەپ حابارلايدى Qamshy.kz ازاتتىققا سىلتەمە جاساپ.

بۇگىن كەشكىلىك Facebook الەۋمەتتىك جەلىسىندە استانا ورتالىعىنداعى ادىلبەك مەيراموۆتىڭ ءۇيىن ءسۇرىپ جاتقان فوتو جاريالاندى.

مەيراموۆتىڭ ءوزى ازاتتىققا بۇگىن وتباسىمەن استانانىڭ وڭتۇستىك-شىعىسىنداعى اۋدانداردىڭ بىرىنە ءۇش بولمەلى پاتەرگە كوشكەنىن حابارلادى. ونىڭ ايتۋىنشا، پاتەردى «قالا اكىمىنىڭ ارالاسۋىمەن دەمەۋشىلەر بەرگەن».

مەيراموۆ باسقا دا قوسىمشا اقپاراتتاردى الداعى ۋاقىتتا ايتۋعا ۋادە بەردى.

24 ماۋسىمدا مەيراموۆتار وتباسىن استانانىڭ ورتالىعىنداعى جەكە مەنشىك ۇيىنەن شىعارۋعا كەلگەن سوت ورىنداۋشىلارى بەس ساعاتتان استام ۋاقىت بويى تالپىنعانىمەن، ەش ناتيجە شىعارا الماعان ەدى. ءۇيدى ىشىنەن جاۋىپ العان وتاعاسى ادىلبەك مەيراموۆ ەگەر ۇيگە بوتەن ادام جاقىندايتىن بولسا قولىنداعى گاز باللونىن جارىپ جىبەرەتىنىن ەسكەرتىپ، باللونعا قوسا سىرىڭكە، تامىزىق گازەت ۇستاپ، باسپاناسىنا سوت ورىنداۋشىلارىن كىرگىزبەي قويعان.

تەرەزەدەن باسىن شىعارىپ تۇرعان ول «ۇيدە ءۇش جاس بالاسى بار» ەكەنىن ايتىپ، قالا اكىمى اسەت يسەكەشيەۆپەن كەزدەسۋدى جانە وزىنە تولەنەتىن وتەماقى ماسەلەسىن شەشۋ ءۇشىن ارنايى كوميسسيا قۇرۋدى تالاپ ەتكەن بولاتىن.

سوت بۇعان دەيىن مەيراموۆتاردىڭ جەرى «مەملەكەتكە قاجەتتىلىگىنە» بايلانىستى ءۇيىن ءسۇرۋ تۋرالى شەشىم شىعارعان. ادىلبەك مەيراموۆتىڭ سوزىنشە، سوت وتباسىنا ەكى ميلليون 60 مىڭ تەڭگە كولەمىندە عانا «ادىلەتسىز وتەماقى» تاعايىنداعان. ول بۇل سوماعا باسقا ءۇي ساتىپ الا المايتىنىن ايتادى.