اكتريسا گۇلشارات جۇبايەۆانى كوپشىلىك «كەلىن» ءفيلمى ارقىلى بىلەدى. «كەلىندە» كەلىن ءرولىن سومداعاننان كەيىن ازداپ كورەرمەنگە جاقپاي قالعانى بار.
ءبىراق گۇلشارات ودان كەيىن دە تاربيە مەن تاعىلىمعا تولى «قاراشاڭىراق»، «اكە سەرتى»، «ءسىز كىمسىز، كا مىرزا؟» سەكىلدى كينوتۋىندىلارعا تۇسكەن. سوڭعى كەزدەرى ول «فەيسبۋك» الەۋمەتتىك پاراقشاسىندا ءوزى تىككەن كيىمدەرىن، قولونەر بۇيىمدارىن جارنامالاي باستادى. گۇلشاراتتىڭ قازاقى ويۋ-ورنەكپەن كومكەرىلگەن دۇنيەلەرى ءبىزدى تاڭداي قاقتىردى. سوسىن «وسىنىڭ ءبارىن شىنىمەن ءوزى تىگە مە؟» دەگەن ساۋال تۋىندادى. نە دە بولسا، ءبارىن وزىنەن سۇرايىق دەپ شەشتىك.
– گۇلشارات، اڭگىمەمىزدى ءوزىڭىزدىڭ تۋىپ-وسكەن جەرىڭىزدەن باستاساق...
– مەن وزبەكستاندا، نۇكىس قالاسىندا 1985-جىلى دۇنيەگە كەلگەنمىن. وتباسىندا جەتى اعايىندىمىز – ءتورت ۇل، ءۇش قىز. تاعدىردىڭ جازۋى بولار، ءتورت باۋىرىمنان دا ايىرىلىپ قالدىق. ءقازىر ءۇش قىزبىز. وزىمنەن كەيىن ەكى ءسىڭلىم بار. اكەم ءومىر بويى تاريح ءپانىنىڭ ءمۇعالىمى بولىپ ەڭبەك ەتكەن، ءقازىر زەينەتتە. ال انام – اگرونوم.
ءبىز 2001-جىلى وتباسىمىزبەن اتىراۋعا كوشىپ كەلگەنبىز. الدىمەن مۋزىكالىق ۋچيليششەدە بي ونەرى بويىنشا ءبىلىم العانمىن. ەكىنشى ماماندىعىم – زاڭگەر. اتا-انام ونەرگە بارۋىما ازداپ قارسىلىعىن ءبىلدىرىپ، سالماقتىراق ماماندىقتى تاڭدا دەگەن سوڭ، زاڭگەرلىك سالا بويىنشا جوعارى ءبىلىم الدىم. ءبىراق بالا كۇنىمنەن ونەرگە جاقىن بولعاننان كەيىن مەن ودان الىستاپ كەتە المادىم. زاڭگەرلىك ماماندىقپەن قانشا جەرگە جۇمىسقا كىرگىزدى، ءتىپتى پروكۋراتۋرادا دا جۇمىس ىستەپ كوردىم. ءبىراق كوپ ۇزاماي شىعىپ كەتتىم. قىسقاسى، ول سالا مەنىڭ جانىما جاقىن ەمەستىگىن ءتۇسىندىم. اتىراۋدا تەاتردا جۇمىس جاساپ جۇرگەن كەزىمدە، رەجيسسەر تالعات تەمەنوۆتەن الماتىداعى ع.مۇسىرەپوۆ اتىنداعى جاستار تەاترىنا شاقىرتۋ الدىم. ءسويتىپ 2007-جىلى الماتىعا كەلىپ، ارى قاراي ءار ءتۇرلى كاستينگتەردەن ءوتىپ، فيلمدەرگە ءتۇسۋ جۇمىسى باستالىپ كەتتى.
– ءسىزدىڭ كينو الەمىندەگى تۇساۋىڭىزدى «كەلىن» ءفيلمى كەستى مە؟
– سولاي. نەگىزى «كەلىندى» كورگەن ءاربىر كورەرمەندە ماعان دەگەن ءبىرتۇرلى كوزقاراس قالىپتاسقان. ويتكەنى قازاقتا بۇرىن-سوڭدى مۇنداي فيلم بولماعان عوي. بارىنە كىنالى – ونەرگە عاشىقتىعىم. كىشكەنتايىمنان بي بيلەدىم، سپورتقا قاتىسىپ، تاەكۆاندودان قارا بەلبەۋ يەسى (ءبىرىنشى دان) اتاندىم، سۋرەتشى دە بولا جازدادىم. ءبىراق كينوعا ءتۇسۋ مەنىڭ باستى ارمانىم ەدى. مەندەگى ءبىر «شانس» «كەلىن» ءفيلمى بولدى. العاشىندا-اق رەجيسسەر ماعان: «كەيىپكەرىڭنىڭ جالاڭاشتاناتىن جەرلەرى بار»، – دەدى. ادامعا اناسىنان ارتىق جان جوق قوي، اناممەن اقىلداستىم. «قىزىم، ءوزىڭ ءبىل. اكەڭنىڭ رۇقساتىن ال»، – دەدى ول كىسى. ال اكەم: «قىزىم، ەگەر جۇرەگىڭ شىن ونەر دەپ سوعىپ تۇرسا، بەتىڭنەن قاقپايىن. ءىشىڭ جالاڭاشتانباسا بولعانى دا»، – دەدى.
– ءقازىر ءبىر ءۇيدىڭ ءتۇتىنىن تۇتەتىپ وتىرعان كەلىن، اياۋلى انا، ادال جار ەكەنىڭىزدى بىلەمىز. ودان بولەك، الەۋمەتتىك جەلىلەر ارقىلى ءارتۇرلى قولونەر بۇيىمدارىن، قازاقى ناقىشتاعى تۇرمىستىق زاتتاردى تىگەتىن ونەرىڭىز بار ەكەن...
– ءيا، مەنىڭ انام – تىگىنشى. ءوزىنىڭ 40 تىگىنشىسى بار كاسىپورنى بولاتىن، ءالى دە تىگىستەن قول ۇزگەن جوق. ءىس تىگۋ ونەرىن كىشكەنتاي كۇنىمنەن انامنىڭ قاسىندا ءجۇرىپ ۇيرەندىم. ءقازىر مەنىڭ ەكىنشى جۇمىسىم – تىگىنشىلىك. «شابىت» دەپ اتالاتىن شاعىن مەكەمەمىز بار، ونىڭ قۇرامىنا تىگىن سەحى، ەلۋ ادامنان قۇرالعان بي ءانسامبلى كىرەدى. ياعني بيشىلەرىمىزدىڭ ساحنالىق كيىمدەرىن، باسقا دا سىرتتان كەلەتىن تاپسىرىستاردى تىگۋمەن اينالىسامىز. بىلتىرعى جىلدىڭ جەتىستىگى دەسەم دە بولادى، ءوزىمىز قۇرىلىس جۇمىستارىن جۇرگىزىپ، بي مەكتەبىن، ۇلكەن تىگىن سەحىن اشتىق. ءقازىر سول بي مەكتەبىمىزگە كىشكەنتاي بالالار قابىلداپ، ولاردى تاربيەلەپ جاتىرمىز.
– وسى رەتتە ءارتىس بولامىن دەيتىن ىنى-سىڭلىلەرىڭىزگە قانداي كەڭەس بەرەر ەدىڭىز؟ جالپى، بالام ءارتىس بولسا دەپ جۇرگەن اتا-انالار الدىمەن قايدا بارۋى كەرەك؟
– راسىندا دا وسى سۇراققا جاۋاپ تابا الماي جۇرگەن جاندار كوپ. مەن ونداي كىسىلەرگە مىنانى ايتامىن: بالانى ەشۋاقىتتا شەكتەمەڭىز. سپورتپەن اينالىسقىسى كەلدى مە، بەتىنەن قاقپاڭىز، ۇيىرمەگە قاتىستىرىڭىز. بيلەگىسى كەلدى مە، بيشىلەردەن ءدارىس السىن. ءان دە ايتسىن. ياعني بالاعا «سەن مىنا سالانىڭ عانا مامانى بولاسىڭ!» دەپ تالاپ قويماڭىز. ۋاقىت وتە كەلە بالا قانداي سالانى قالايتىنىن ءوزى شەشەدى. ماسەلەن، مەنى اتا-انام ەشتەڭەدەن شەكتەگەن جوق. جاڭا ايتىپ وتكەنىمدەي، سپورتپەن دە اينالىستىم، ات سپورتىنان دا حابارىم بار، بيدەن ءدارىس الدىم، زاڭگەرلىكتى ءبىتىردىم، كينو سالاسىندا ەڭبەك ەتىپ جاتىرمىن، تىگىنشىلىگىم تاعى بار. ياعني بالانىڭ بويىندا ءبىر ەمەس، بىرنەشە ونەر بولعانى دۇرىس.
– وسىنىڭ بارىنە قالاي ۇلگەرەسىز؟ جاسىراتىنى جوق، جۇمىسى مەن ءۇي شارۋاسىن قاتار الىپ جۇرە المايتىن ايەلدەر بار ارامىزدا. سولارعا ءوز قۇپياڭىزبەن بولىسەسىز بە؟
– مەن اتا-ەنەممەن بىرگە تۇرامىن. سوندىقتان وتباسىمنىڭ بەرەكە-بىرلىگى، شاڭىراقتىڭ تازالىعى، جايلىلىعى – مەنىڭ موينىمدا. كەشكە دەيىن جۇمىستارمەن جۇرسەم دە، ۇيگە كەلگەن سوڭ بار شارۋانى ءوزىم ىستەيمىن. كۇيەۋىمنىڭ، بالالارىمنىڭ ەرتەڭگى كۇنگە كيەتىن كيىمدەرىن دايىنداپ، ءۇيدىڭ ءىشىن جيناپ، تاڭەرتەڭگى داستارحانعا قوياتىن تاتتىلەردى ءپىسىرىپ بارىپ ۇيىقتايمىن. جالپى، مەنىڭ تۇسىنىگىمدە، ايەل دەگەن وسىنداي بولۋى كەرەك. جۇمىس ىستەيمىن دەپ شەشتىڭىز بە، وندا بارىنە ۇلگەرۋگە مىندەتتىسىز.
جاپ-جاس بولىپ اقىل ايتتى دەمەسسىزدەر، تاعى بىرەر كەڭەس بەرسەم دەيمىن. وتباسى باقىتى – ايەلدىڭ قولىندا. باردى ۇقساتىپ جاراتسا، جوققا سابىرلىقپەن قاراسا ءبارى جاقسى بولادى. قانداي جاعداي بولماسىن، اشۋلانباڭىز. بارىنە تۇسىنىستىكپەن قاراڭىز. «اناۋ جوق، مىناۋ جوق» دەپ كۇيەۋىڭىزدىڭ ميىن اشىتا بەرمەڭىز. سىزگە دەگەن سەزىمى سۋىپ كەتۋى مۇمكىن.
– سوڭعى سۇراق بولسىن، ءتۇر-سىمباتىڭىزعا قانداي دا ءبىر ەرەكشە كۇتىم جاسايسىز با؟
– ديەتا ۇستامايمىن. ارتىق سالماق قوسپاۋىمنىڭ سىرى – كۇندەلىكتى بيمەن اينالىسىپ وتىرامىن. ايتپاقشى، ايەلدەرگە دە وسىنداي كەڭەس بەرەمىن. كۇن سايىن بيلەڭىزدەر، ارىقتاۋدىڭ ەڭ قاراپايىم ءتاسىلى – وسى. ءسان سالوندارىنا دا ءجيى بارامىن دەپ ايتا المايمىن. بەتىمە، شاشىما ۇيدە، قولدا بار زاتتاردى پايدالانا وتىرىپ كۇتىم جاسايمىن.
– اڭگىمەڭىزگە راحمەت. ونەرىڭىز ورلەي بەرسىن!
سۇحباتتاسقان – ا. قاسىمبەك، "زامانا"
