اقورداداعى قاۋىپسىزدىك كەڭەسىنىڭ جيىنىندا ىشكى ىستەر ءمينيسترى قالمۇحانبەت قاسىموۆ پرەزيدەنتكە الماتىداعى وقيعانىڭ حرونولوگياسىن ايتىپ بەردى، - دەپ حابارلايدى Qamshy.kz Tengrinews.kz -كە سىلتەمە جاساپ.

ناقتىراق ايتقاندا، قاسىموۆ نۇرسۇلتان نازاربايەۆقا الماتىلىق اتقىشتىڭ وتكەن تۇندە ادام ولتىرگەنىن حابارلادى. ءىىم باسشىسىنىڭ ايتۋىنشا، كۇدىكتى جەزوكشەنى ولتىرگەن.

"تۇنگى ساعات 3.52-دە ول ايەلدى ءولتىردى. بىزدە كۋاگەرلەر بار، ول جەڭىل ءجۇرىستى قىزدارمەن جانجالداسقان، ولاردىڭ ءبىرى وزبەكستان ازاماتشاسى. ول قىز وتىرعان كولىككە كەلىپ، تاكسي جۇرگىزۋشىسىنەن جارىقتى قوسۋىن سۇراپ، تاپانشامەن وق اتقان، كەيىن كولىكتى ايداپ اكەتكەن. بۇل كولىكتى قازا بولعان قىزبەن بىرگە تاپتىق"، - دەدى مينيستر.

سونىمەن قاتار، مينيستر لاڭكەسپەن بىرگە جۇرگەن ەكىنشى ادام جايلى ايتىپ بەردى. 

"ءقازىر ەكىنشى ادام دا انىقتالدى، ول كۋاگەر بولىپ شىقتى. ءقازىر ونىڭ قاتىسى بار-جوعىن انىقتاپ جاتىرمىز. قارۋى تاركىلەندى، شابۋىلعا قاتىسقانداردىڭ بارلىعى ۇستالدى"، - دەپ مالىمدەدى ءىىم باسشىسى.

قاسىموۆ وقيعا تىزبەگىن بايانداي وتىرىپ، بۇگىن ساعات 10.54-تە بەلگىسىز بىرەۋدىڭ المالى اۋداندىق ىىب-گە كەلگەنىن حابارلادى. پوستتاعى پوليسەي قۇجاتىن سۇراعان كەزدە ول تاپانشاسىن الىپ شىعىپ، ەكى مارتە وق اتقان، ءسويتىپ ونى جاراقاتتايدى. كەيىن ول پوليسەيدىڭ اۆتومات قارۋىن الىپ، كەزەكشى ءبولىم جاققا بىرنەشە رەت وق اتقان، اۋداندىق ءىىب اۋلاسىندا تۇرعاندارعا دا بىرنەشە رەت وق اتقان. وسى كەزدە ءتورت پوليسەي جاراقات العان، ءبىر ازامات (ونى مينيستر "ءبىزدىڭ بۇرىنعى زەينەتكەر" دەپ اتادى) قازا تاپتى.  

"وسىدان كەيىن قىلمىسكەر كوشەگە جۇگىرىپ شىعىپ، كولىككە وتىرعان. ءبىز ەكىنشى دەپ ەسەپتەگەن ادامدى كۇدىكتى قورقىتىپ، بايزاقوۆ كوشەسىنە جەتكىزۋىن تالاپ ەتكەن. جول بويىندا ول پاترۋلدىك پوليسيا قىزمەتكەرلەرىنە وق اتقان. ۇقك دەپارتامەنتىنىڭ عيماراتىنىڭ الدىنا كەلگەن ول كولىكتەن شىعىپ، تاعى دا وق اتقان، ەكى قىزمەتكەردى جاراقاتتاعان. وسى ۋاقىتتا جۇرگىزۋشى قاشىپ كەتكەن. ءبىز ونى تاپتىق"، - دەدى مينيستر.

وسىدان كەيىن قىلمىسكەر تاعى ءبىر كولىكتى توقتاتىپ العان، كولىكتە شەكارا قىزمەتىنىڭ اعا لەيتەنانتى وتىرعان. "ونىمەن بىرگە ول اباي داڭعىلىنا دەيىن جەتىپ العان، ءبىراق اعا لەيتەنانت قارسىلىق كورسەتكەن بولۋى كەرەك، ول ءۇشىنشى مەكەن-جايعا كەلىپ جەتكەندە ءبىزدىڭ كەزەكشىلىكتە تۇرعان پوليسەيلەرمەن اتىسا باستادى. بىرەۋى جاراقات الىپ، قازا تاپتى، ەكىنشىسى ونى جاراقاتتاپ، قولىنا كىسەن سالدى. تاپانشاسى مەن اۆتوماتىن تاركىلەدى"، - دەدى ۆەدومستۆو باسشىسى.