كەشە الەۋمەتتىك جەلىلەر ارقىلى سول كۇدىكتىلەردى ۇستاۋ وپەراسياسىنىڭ سۋرەتتەرى "قولدان قولعا" تەز تارادى. وندا ۇستالعان ازاماتتىڭ قالتاسىنان شىقتى دەلىنگەن ءبىر جاپىراق قاعاز جۇرت تاراپىنان كەڭ تالقىلانىپ، كۇدىكتىنىڭ ءدىني اعىمداردىڭ بىرىنە قاتىسى بار بولۋى مۇمكىن ەكەنى دە ايتىلعان ەدى. ال، ماڭعىستاۋلىق يمام يسمايىل سەيىتبەكوۆ بولسا قاعازعا جازىلعان جازبا سالافيزم اعىمىنىڭ اقيداسى بويىنشا كاليمانىڭ 7 شارتى ەكەنىن ايتىپ وتىر. بۇل تۋرالى ول ءوزىنىڭ Facebook-پاراقشاسىنا جازدى، - دەپ حابارلايدى Qamshy.kz Skifnews.kz - كە سىلتەمە جاساپ.

«بۇگىنگى الماتىداعى تەررورلىق ارەكەتتى جاساعاندار سالافيتتەر ەكەنى تاعى دالەلدەندى. سالافيتتەر وزدەرىن سۋدان تازا، سۇتتەن اقپىز، تەررورلىق ارەكەتتى جاسايتىندار تاكفيرلەر دەپ، تاكفيرلەردى جامانداۋعا كىرىسەدى. ال، ۇستالعان جىگىتتىڭ قالتاسىنان شىققان قاعازدا مۇحاممەد يبن ابدۋلۋاھھاب نەگىزىن قالاعان ۋاھھابي، ءسالافي اعىمىنىڭ اقيداسى بويىنشا كاليمانىڭ 7 شارتى جازىلعان. سالافيتتەر سول شارتتارعا سايكەسپەگەن ادامدى مۇسىلمان ساناماي كاپىرگە، اداسقانعا شىعارادى. پايعامبارىمىزدىڭ (س.ا.ۋ.) حاديسىندە مۇنداي 7 شارت جوق جانە ەشبىر جانعا يسلامدى قابىلدار كەزىندە مۇنداي تالاپ قويماعانىن بىلەمىز. ءاھلۋ سۇننەت سەنىمى بويىنشا ءلا ءيلاھا يللالاھ مۋحاممادۋر راسۋلۋللاھ دەگەن ادام مۇسىلمان سانالادى. سول قاعاز لاڭكەس جىگىتتىڭ ءسالافي ەكەنىنە ناقتى دالەل دەپ سانايمىن. بۇعان سالافيلەر نە ءۋاج ايتار ەكەن؟»، - دەيدى يمام ءوز سوزىندە.

وسى رەتتە ايتا كەتۋ كەرەك، كەشە كەشكىسىن مەملەكەت باسشىسىنىڭ توراعالىعىمەن وتكەن قاۋىپسىزدىك كەڭەسىنىڭ وتىرىسىندا ق ر ۇقك ءتوراعاسى ۆلاديمير جۇماقانوۆ الماتىداعى لاڭكەستىكتى جاساعان قىزىلوردا وبلىسىنىڭ تۋماسى كۋليكبايەۆ رۋسلان الپىس ۇلى ەكەنىن ايتتى. كۇدىكتى بۇعان دەيىن ەكى رەت سوتتالعان جانە تۇرمەدە سالافيزم ۇستانۋشىلارىمەن تىعىز بايلانىستا بولعان دەيدى ۇلتتىق قاۋىپسىزدىك كوميتەتىنىڭ باسشىسى.
ال، الماتى قالالىق ءىىد باسپا ءسوز حاتشىسى سالتانات ازىربەك بولسا اتالعان تەراكتىنىڭ ارتىندا سالافيلەر تۇر دەپ ايتۋ ءالى ەرتەرەك دەگەن بولاتىن.