رەسەي فەدەراسياسىنىڭ قورعانىس مينيسترلىگى باتىس قازاقستان وبلىسىندا 2 ملن گەكتاردان استام جەردى جالعا العان. رەسەي تاراپى 1 ملن 400 مىڭ گەكتار پوليگوندى قايتارىپ بەردى. بۇل تۋرالى ايماقتىق ورتالىق كوممۋنيكاسيالار قىزمەتىندەگى بريفينگ بارىسىندا بەلگىلى بولدى، - دەپ حابارلايدى Qamshy.kz BNews.kz-كە سىلتەمە جاساپ.

«ءقازىر كورشى ەلدىڭ يەلىگىندە جالعا الىنعان 945 مىڭ گەكتار جەر بار. ول ءۇش ساناتقا بولىنەدى. 150 مىڭ گا ءبىرىنشى ساناتقا جاتادى. مۇندا ءتىپتى كىرۋگە رۇقسات جوق. قالعان جەردە فەرمەرلەر مال باعىپ، ءشوپ ورۋدا. بۇل اۋماقتا 97 شارۋا قوجالىعى جۇمىس ىستەيدى»، - دەپ اتاپ ءوتتى بقو بوكەي ورداسى اۋدانىنىڭ اكىمى نۇرلان راحىمجانوۆ.

بيىل رەسەي 1 ملن 400 مىڭ گەكتار جەردى قايتارىپ بەردى. ءقازىر ۋچاسكەلەردى بولۋگە قاجەتتى قۇجاتتار دايىندالىپ جاتىر.

سونىمەن قاتار ۇكىمەتتىك دەڭگەيدە كەلىسىلۋى ءتيىس تاعى ءبىر ماسەلە بار.

«بوكەي ورداسى اۋدانى اۋماعى ارقىلى كۇن سايىن 5 جولاۋشىلار جانە 11 جۇك پويىزى وتەدى. ولاردىڭ ەشقايسى توقتامايدى. ماسەلەنى تۇرعىندار ۇنەمى كوتەرىپ كەلدى. بۇل پروبلەما شەشىلەدى دەگەن ۇمىتتەمىز»، - دەپ اتاپ ءوتتى ن.راحىمجانوۆ.

ايتا كەتۋ كەرەك، رەسەيدىڭ «ازعىر» جانە «كاپۋستين يار» پوليگوندارىنىڭ اۋماعى اتىراۋ وبلىسى قۇرمانعازى اۋدانىنىڭ سولتۇستىك بولىگىمەن جانە بقو بوكەي ورداسى جانە جاڭاقالا اۋداندارىمەن شەكتەسىپ جاتىر. مۇندا 28 مىڭ ادام تۇراتىن 39 ەلدى مەكەن ورنالاسقان.