وسى جازدان باستاپ «كەرەمەت كۇن» وتباسىلىق-مەرەكەلىك جۋرنالى ءوز جۇمىسىن باستادى. ماقساتى – اعايىن-تۋىستىڭ اراسىن جاقىنداستىرۋ، ءانشى مەن شوۋدان اقشاسىن ايامايتىن ازاماتتاردى اقشا ۇنەمدەۋگە، ماعىنالى ىسكە جۇمساۋعا شاقىرۋ. ارينە، ودان سوڭ كومەرسيالىق باعىتتى كوزدەيدى. ونىڭ دا سەبەبى بار...
جۋرنال توي يەسى تۋرالى تولىق مالىمەتتى، وتباسىنىڭ، اۋلەتىنىڭ تاريحىن قامتيدى، بالا كەزدەن بەرگى سۋرەتتەرىنە، دوستارىنىڭ ەستەلىكتەرىنە ورىن بەرەدى. كەز كەلگەن توي تۇرىنە، اسقا، اۋلەت، رۋ، ياكي ۇجىمنىڭ تاريحىنا ارنالاتىن باسىلىم ءار ءنومىرىن ءبىر تويعا (اسقا، رۋعا، ت.ب) ارنايدى. شىعارۋشىلاردىڭ ايتۋىنشا، بۇل بولاشاق ۇرپاق ءۇشىن ەستەلىك بولماق. جۋرنالدىڭ ۇرانى دا وسى ماندەس: «تاريحتى بىرگە تاڭبالايىق». ياعني، ءاربىر توي، اس – ول اۋلەتتىڭ تاريحى، ول ورنىمەن قاعازعا تۇسسە، كەلەشەك ۇرپاق ءۇشىن قۇندى جادىگەر بولادى.
جانە جۋرنالدىڭ تاعى ءبىر ارتىقشىلىعى، كەيىنگى كەزدە كوپتەپ جارىق كورىپ جاتقان اۋلەتتىك كىتاپتارعا قاراعاندا اسەرلى دە ءتيىمدى. سەبەبى، ءماتىننىڭ ساپاسى جوعارى بولادى، ءارى سۋرەتتەرمەن كوركەمدەلەدى. تويدا، استا تاراتۋعا ىڭعايلى، قىز جاساۋىنا قوسۋعا بولادى. باعاسى دا انشىلەرگە بەرىلەتىن اقشادان قىمبات ەمەس.
جۋرنال تۋرالى باستاما كوتەرگەن ازاماتتار وسىعان دەيىن ءارتۇرلى ۇلتتىق باعىتتاعى جوبالار باستاعانىن، ءبىراق قاراجات ماسەلەسى شەلمەگەندىكتەن، جۇمىستارى ويداعىداي جۇرمەگەنىن ايتادى. ەندى وسى «كەرەمەت كۇن» سول جوبالارعا دەمەۋشى بولۋى ءتيىس.
«كەرەمەت كۇن» جۋرنالى مەملەكەتتىك تىركەۋدەن ءوتىپ، كۋالىك العان، يدەياسى يەسىنە تىركەلىپ، راسىمدەلگەن. بارلىق قۇقىقتارى قورعالعان.
