مەملەكەت باسشىسى نۇرسۇلتان نازاربايەۆ «ازيا اۆتو» كاسىپورنىندا بولىپ، «لادا» جەلىسىنىڭ جاڭا مودەلدەرىمەن تانىستى، سوگرا كەنتىندەگى تولىق سيكلدى اۆتوموبيل زاۋىتىنىڭ قۇرىلىسىن ارالادى، - دەپ حابارلايدى Qamshy.kz Altaynews.kz  -كە سىلتەمە جاساپ.

ءبىر اپتا بۇرىن عانا تۇساۋى كەسىلگەن جاڭا وندىرىستىك جەلىنى ەلباسىعا كاسىپورىننىڭ ديرەكتورلار كەڭەسىنىڭ ءتوراعاسى اناتوليي بالۋشكين تانىستىردى. «بيپەك اۆتو-ازيا اۆتو» كومپانيالار توبى بۇگىندە General Motors، SkodaAuto، Volkswagen، KIA Motors، Renault-Nissan اۆتوۆاز سياقتى الەمدىك كونسەرندەرمەن تەحنولوگيالىق ارىپتەستىك ورناتىپ، ەلدەگى اۆتوموبيل ءوندىرىسىن العا سۇيرەپ كەلەدى. كاسىپورىننىڭ «لادا» ماركالى ونىمدەرىنە قازاقستاندىقتار تاراپىنان سۇرانىس مول. بۇعان دەيىن «ازيا اۆتو» اتالمىش جەلىنىڭ تەك Lada 4ح4 جانە Urban مودەلدەرىن عانا شىعارىپ كەلگەن. جول تالعامايتىن بۇل «نيۆالاردىڭ» ءبىرى اۋىلدى ايماققا ارنالسا، ءبىرى قالالى جەرلەرگە لايىقتالعان بولاتىن. ەندى ولارعا Lada Granta، Lada Kalina جانە Lada 4x4 5d مودەلدەرى قوسىلىپ وتىر. الداعى تامىز ايىندا ولاردىڭ قاتارىن Priora تولىقتىرادى. ال قىركۇيەككە قاراي Vesta جانە XRAY كروسسوۆەرىن، امبەباپ Largus كولىگىن ءوندىرۋ جولعا قويىلادى. زاۋىتتىڭ اعا شەبەرى داۋرەن بالعابايەۆ – «بولاشاق» باعدارلاماسىنىڭ تۇلەگى. بۇعان دەيىن الەمگە ايگىلى جەتى ماشيناساۋشى كومپانيانىڭ تاجىريبەسىمەن تانىسىپ، Volkswagen كومپانياسىندا جۇمىس ىستەگەن مامان مۇنداعى ءونىم ساپاسى المانيالىق كولىكتەردەن ەشبىر كەم تۇسپەيتىنىن اتادى. 

كاسىپورىن باسشىلىعى پرەزيدەنتكە Lada Largus كولىگىن «ورتالىقتاندىرىلعان قالالىق تاكسي» جوباسىنا ۇسىندى. ۇلت كوشباسشىسى بولاشاقتا ەلىمىزدىڭ قالالارىندا بىرىزدەندىرىلگەن قالالىق تاكسي قىزمەتىن جولعا قويۋ قاجەتتىگىن قاداپ ايتقانى بەلگىلى. ا.بالۋشكيننىڭ ايتۋىنشا سول ويدىڭ ۇدەسىنەن شىعۋ جولىندا Lada Largus مودەلى تاپتىرماس نۇسقا بولماق.

-بۇل كولىكتىڭ شاناعى وزگە جەڭىل اۆتوموبيلدەرگە قاراعاندا الدەقايدا بيىك. مۇنداي بيىكتىك كليەنتتىڭ ەمىن-ەركىن وتىرۋىنا وتە قولايلى. ال كولىكتىڭ ارتقى بولىگىندەگى جۇكسالعىشى مەيلىنشە كەڭ. قوسالقى بولشەكتەرى مەن قىزمەت كورسەتۋ قۇنى وزگە مودەلدەرگە قاراعاندا ارزان. سوندىقتان ونى قالالىق تاكسي كولىگى رەتىندە پايدالانۋعا ابدەن بولادى، - دەدى اناتوليي بالۋشكين. ءوز كەزەگىندە مەملەكەت باسشىسى كومپانيانىڭ تابىس اياسىن كەڭەيتۋ باعىتىنداعى ىزدەنىسىن قۇپتايتىنىن جەتكىزدى.

ەسىمجان ناقتىباي ۇلى