بۇگىن استانا كۇنى قارساڭىندا وسكەمەندە 140 ورىندىق بولاشاق بالاباقشانىڭ ورنىنا سالتاناتتى تۇردە كاپسۋلا قويدى. جالپى سوماسى 405 ملن. تەڭگەنى قۇرايتىن الەۋمەتتىك جوبا 2014 جىلى وسكەمەن اكىمدىگى مەن قازاقستانداعى AES كومپانيالار توبى جانە «ورتالىق ازيانىڭ ەۋرازيا قورى» قول قويعان  كورپوراتيۆتى الەۋمەتتىك جاۋاپكەرشىلىك ءوزارا ىنتىماقتاستىق بويىنشا مەموراندۋم اياسىندا جۇزەگە اسۋدا.

بالاباقشانىڭ ورنىن وسكەمەن اكىمدىگى قالا دامۋىنىڭ باس جوسپارىنا سايكەس ماشينوسترويتەلي كوشەسىنىڭ بويىنان ءبولدى. شاعىن اۋداننىڭ تۇرعىندارى ءۇشىن اتالعان الەۋمەتتىك نىسانعا دەگەن سۇرانىس جوعارى. بالاباقشا عيماراتىنىڭ قۇرىلىسى اياقتالعان سوڭ ول قالاعا تەگىن سىيلىق رەتىندە تاپسىرىلادى.  

شاراعا شقو اكىمىنىڭ ورىنباسارى  جاقسىلىق ومار، قازاقستانداعى AES كورپوراسياسىنىڭ ۆيسە-پرەزيدەنتى دۇيسەن مەرعالييەۆ، «ورتالىق ازيانىڭ ەۋرازيا قورىنىڭ» اتقارۋشى ديرەكتورى  ريناد تەمىربەكوۆ، قالالىق اكىمدىك وكىلدەرى قاتىستى. شارانى اشقان دۇيسەن مەرعالييەۆ  بۇل شقو تۇرعىندارىنا سىيلىق رەتىندە ۇسىنىلعان ەكىنشى بالاباقشا بولاتىنىن ايتتى.

«وسىعان دەيىن سەمەيگە 160 ورىنعا شاقتالعان بالاباقشانى سىيلاعانبىز. بيىل قازاقستانداعى AES جۇمىسىنا 20 جىل. اعىمداعى جىلى وسكەمەن جەو №12 تۋربواگرەگاتى عانا قولدانىسقا ەنگىزىلىپ قويماي، سونىمەن قاتار وسى ماڭىزدى الەۋمەتتىك جوبا جۇزەگە اساتىنى قۋانتادى».