قازاقستان پارلامەنتى جوعارعى پالاتاسىنىڭ سپيكەرى قاسىم-جومارت توقايەۆ كەشە تۋيتتەردەگى پاراقشاسىندا رەسەي قۇراماسىنىڭ ريو وليمپياداسىنا قاتىسۋ قۇقىعىن يەلەنۋىن دۇرىس شەشىم دەپ باعالادى. بۇل تۋرالى Qamshy.kz حابارلايدى.  

سەنات ءتوراعاسى «حالىقارالىق وليمپيادا كوميتەتى   رەسەيدى  ريو وليمپياداسىنا قاتىستىرۋ تۋرالى دۇرىس شەشىم شىعاردى. «تازا» سپورتشىلار فۋنكسيونەرلەر ءۇشىن جاۋاپكەرشىلىك الماۋ كەرەك»، - دەپ جازدى.

ەستەرىڭىزگە سالساق، لوزاننا قالاسىندا ريو وليمپياداسىنا رەسەي قۇراما كومانداسىنىڭ قاتىسۋ-قاتىسپاۋىنا قاتىستى تالقىلاۋ وتكەن بولاتىن. وتىرىس شەشىمى بويىنشا حالىقارالىق وليمپيادا كوميتەتى رەسەي اتلەتتەرىنىڭ 2016 جىلعى وليمپياداعا قاتىسۋى تۋرالى شەشىمدى سپورت تۇرلەرى بويىنشا حالىقارالىق فەدەراسيا قابىلدايتىنىن ايتتى.

توقايەۆ مىرزانىڭ رەسەيگە بۇيرەك بۇرا سويلەۋى ءبىر بۇل ەمەس. بىلتىر قاراشا ايىندا تۇركيا اسكەريلەرى ءوز اۋە كەڭىستىگىندە رەسەيدىڭ اسكەري ۇشاعىن اتىپ قۇلاتقاندا دا، داۋلى ماسەلەنىڭ باسى اشىلۋىن كۇتپەستەن تۇركيا تاراپىنىڭ ارەكەتىن «نەگىزسىز» دەپ باعالاعان ەدى. ول كەزدە دە سەنات باسشىسىنىڭ پىكىرى قوعامدا ءبىراز سىنعا ۇشارادى.

ەڭ سوراقىسى جىل باسىنداعى سەناتتىڭ كەزەكتى ءبىر وتىرىسىندا سول كەزدەگى ءبىلىم جانە عىلىم ءمينيسترى ا. سارىنجىپوۆتەن قازاقشا سويلەۋىن تالاپ ەتكەن دەپۋتات سارسەنباي ەڭسەگەنوۆتى تىيىپ تاستاپ، قازاق ءتىلىن ونى مەڭگەرگىسى كەلمەي جۇرگەندەرگە جىعىپ بەرگەندەي قىلىق تانىتقان بولاتىن.

ەندى مىنە، تەك ساياساتتا عانا ەمەس، سپورتتا دا كوزگە شىققان سۇيەلدەي بولعان رەسەيگە تاعى اشىق جاقتاسىپ وتىر. وسىدان كەيىن حالىقارالىق قاتىناستاردا كوپۆەكتورلى باعىت ۇستاناتىن ەلىمىزدىڭ ساياسي بەدەلىنە نۇقسان كەلتىرۋى مۇمكىن قيسىق-قىڭىر قىلىقتارىمەن ق. توقايەۆ مىرزا رەسەيگە جاعىنعىسى كەلە مە دەگەن سۇراق تا تۋىندايدى ەكەن.