الماتىدا اتىس جاساعان رۋسلان كۇلىكبايەۆتىڭ ايەلى اياۋلىم ۇمبەتقۇلوۆا پوليسيا قىزمەتكەرلەرى وزىنە قوقان-لوققى جاساعانىن ايتىپ وتىر، - دەپ حابارلايدى Qamshy.kz كتك ارناسىنا سىلتەمە جاساپ.

الماتىدا 6 ادامدى اتىپ ولتىرگەن لاڭكەستىڭ پوليسەيلەرگە وشتەسكەنىن ايەلى دە راستادى. ارام ويىن ءتىپتى تۇرمەدە جاتىپ جوسپارلاعانىن تەرگەۋشىلەرگە ءوزى ايتىپ بەرىپتى. ءبىراق اياۋلىم ۇمبەتقۇلوۆا كۇيەۋىنىڭ ناقتى جوسپارىن بىلمەدىم دەيدى. ونىڭ ۇستىنە سوڭعى كەزدە ۇيدە دە جانجال جيىلەپ، ءتىپتى ايەلىن قوقان-لوققى جاساپ ۇستاپ وتىرعان ەكەن. ال اجىراسىپ كەتۋگە كەلىنشەكتىڭ جۇرەگى داۋالاماعان.

اياۋلىم ۇمبەتقۇلوۆا، رۋسلان كۇلىكبايەۆتىڭ ايەلى:

-ايا  باسقا بىرەۋگە ءتيىپ باقىتتى بولىپ كەتەمىن دەپ ويلاما دەدى. سەنى سول بايىڭمەن قوسىپ ءولتىرىپ كەتەمىن دەدى. اتىپ كەتەمىن دەگەن جوق ءولتىرىپ كەتەمىن دەدى. باسقا قالاعا قاشىپ كەتسەم نە ىستەيسىڭ دەدىم. قاشىپ كەتە بەر، ۇيىڭدەگى جاقىن بىرەۋدى ولتىرەمىن، اكەڭدى شەشەڭدى دەدى. سول كەزدە سول ولىككە كەلەسىڭ عوي  سول كەزدە تاۋىپ الامىن دەدى. سول كەزدە سەنى دە ولتىرەمىن دەدى.     

اياۋلىمنىڭ ايتۋىنشا، كۇيەۋى كىسى ولتىرۋدەن تايسالمايتىن مىنەزدى تۇرمەدەن تاۋىپ كەلگەن. پوليسەيلەرگە شابۋىل جاساۋدى دا سول تەمىر توردىڭ ارعى بەتىندە جاتىپ-اق ويلاستىرىپتى. ءسويتىپ، ۇزاق ۋاقىت جوعالىپ كەتەتىندى دە شىعارعان. سوندىقتان اياۋلىم لاڭكەستىڭ قامالعانىنا قاتتى قىنجىلىپ وتىرعان جوق. كەرىسىنشە كۇيەۋىنىڭ كەسىرىنەن باسى بالەگە قالىپ، تەرگەۋشىلەردەن تەپەرىش كورىپ جاتقانىن جايىپ سالدى. قاتتى قورقىپ قالعان ول وزىنە قۇقىقتىق كەڭەس بەرەتىن زاڭگەرلەردەن كومەك سۇراپ وتىر.

اياۋلىم ۇمبەتقۇلوۆا، رۋسلان كۇلىكبايەۆتىڭ ايەلى:

-شەگىپ وتىرعان تەمەكىسىنىڭ قورابىن لاقتىردى. ءسويتىپ قوقان-لوققى كورسەتىپ جاتىر. مەنىڭ نە كىنام بار؟  نەگە ولار مەنى قيناي بەرەدى؟