اتىراۋدا جەتى جاستاعى مادياس وزگە بالالاردان ەرەكشە. ەكى جاسار ءسابي قالپىندا قالىپ قويعان  ۇلدارىنىڭ جاعدايىنا اتا-اناسى الاڭداۋلى. دارىگەرلەردىڭ مادياسقا قويعان دياگنوزى ەرگەجەيلى.  ال، اناسىنىڭ ايتۋىنشا، كىشكەنتاي ۇلدىڭ دەنساۋلىعىن قالپىنا كەلتىرۋگە بولادى. ول ءۇشىن كوپ قاراجات قاجەت ەكەن، - دەپ حابارلايدى Qamshy.kz 31 ارناعا سىلتەمە جاساپ.

مادياس بايەۆ - قۇلسارى قالاسىنىڭ كىشكەنتاي تۇرعىنى. تۋمىسىنان بويى وسپەي قالعان بالانىڭ تاعدىرى قيىن. مادياس بايەۆتى ءبىر كورگەننەن جەتى جاستا دەپ ايتۋ قيىن. ءبىراق، ەكى جاستاعى بالانىڭ قالپىنداعى ۇلدارىنىڭ قاتارىنان قالىپ بارا جاتقانىنا اسىرەسە اتا-اناسى الاڭدايدى. ال مادياستىڭ ارمانى اسقاق.

شىناشاقتاي ۇلدىڭ «شىتىرمانعا» تولى ءومىر بايانى وزگەلەرگە ۇقسامايدى. دارىگەرلەر مادياسقا ەرگەجەيلى، ياعني مەديسينا تىلىمەن ايتقاندا لورون سيندرومى دەپ دياگنوز قويعان. ءبىراق، ونىڭ بويىن وسىرۋگە ءالى دە مۇمكىندىك بار كورىنەدى. ول ءۇشىن جالپى قۇنى 60 مىڭ اقش دوللارى تۇراتىن ءدارىنى قابىلداۋ كەرەك ەكەن.

- ەسەپتەپ قاراعان كەزدە، ماعان ۆراچتار 40 فلاكون جازىپ بەردى. سول 40 فلاكوننىڭ ءوزى دەگەن 60 مىڭ دوللار تۇرادى. مەنىڭ وعان قاراجاتىم جەتپەيدى. جولداسىم ۆاحتوۆىيدا جۇمىس جاسايدى. 15 كۇن جاساپ، 15 كۇن دەمالادى. ءوزىمىز كۆارتيردا تۇرامىز. كۆارتيرامىزدان اۋىسپايدى، - دەيدى اناسى نۇرگۇل بايەۆا.

«مادياستىڭ بويىنىڭ جەتىلۋى ءۇشىن بارىمىزدى سالىپ جاتىرمىز، ءبىراق، قولىمىز قىسقا بولىپ تۇر» دەگەن اناسى نۇرگۇل ەلدەگى جومارت جانداردان كومەك سۇرايدى.