«گۆاردەيسك» اسكەري پوليگونىندا توتەنشە جاعداي ورىن الدى. ارميا حالىقارالىق ويىندارىنا دايىندىق اياسىندا وتكەن جاتتىعۋ ساباقتارى كەزىندە 120 مم مينومەت جارىلىپ، انگولا كومانداسىنىڭ اسكەريلەرى زارداپ شەكتى، - دەپ حابارلايدى Qamshy.kz BNews.kz - كە سىلتەمە جاساپ.

سالدارىنان ءبىر اسكەري قىزمەتشى اۋىر حالدە جاتىر، بىرنەشە اسكەري قىزمەتشى جەڭىل جاراقات الدى. زارداپ شەككەندەر وتار اسكەري بازاسىنىڭ جەكە مەديسينالىق جاساعىنا جەتكىزىلدى. الدىن الا تەرگەۋ بويىنشا، انگولا كومانداسى 2ب11 مينومەتىنەن وق اتۋ كەزىندە قاۋىپسىزدىك شارالارىن ساقتاماعان. كەلىسىمسىز وكوپتان شىعىپ، اتۋ پوزيسياسىنىڭ ورنىن اۋىستىرعان. بۇل ورەسكەل قاتەلىك بولىپ سانالادى. سونداي-اق، سناريادتىڭ جارىلۋىنا ەكى مارتە وقتاۋ دا سەبەپ بولۋى مۇمكىن.

ق ر قورعانىس ءمينيسترى يمانعالي تاسماعامبەتوۆتىڭ بۇيرىعىمەن قورعانىس ءمينيسترىنىڭ ورىنباسارى گەنەرال-لەيتەنانت وقاس ساپاروۆتىڭ جەتەكشىلىك ەتۋىمەن كوميسسيا قۇرىلدى. ول جاعدايدى انىقتاپ،كەشەندى تەكسەرىس جۇرگىزۋ ءۇشىن وقيعا ورنىنا ۇشىپ شىقتى.

«مۇنىڭ الدىندا باس تورەشى – «ارتيللەريالىق وق اتۋ شەبەرلەرى» بايقاۋىنىڭ جەتەكشىسى گەنەرال-مايور لۇت الشەكەنوۆ 13 ەلدىڭ كومانداسىنا تەحنيكا قاۋىپسىزدىگى بويىنشا نۇسقاۋ وتكىزگەنىن ايتا كەتۋ قاجەت. قاتىسۋشىلار تەك اتالعان پروسەدۋرادان كەيىن عانا جاتتىعۋعا  كىرىستى»، - دەپ مالىمدەدى ق ر قورعانىس مينيسترلىگىنىڭ باسپا ءسوز قىزمەتىنەن.