كوك اقشانىڭ قۇنىن ادەيى ءوسىرىپ جىبەرگەن. تەڭگەنىڭ كەشە كۇنى بويى تومەن قاراي قۇلديلاۋىنا كوپپەن بىرگە كۋا بولعان قارجىگەرلەر بۇعان ايىرباستاۋ ورىندارىن كىنالادى. بيرجاداعى باعا 350 تەڭگەنى كورسەتكەنىمەن، الىپساتارلار دوللاردى 364 تەڭگەگە دەيىن كوتەرىپ جىبەرگەن بولاتىن. كۇللى جۇرتتىڭ نازارىن قايتا وزىنە بۇرعان باعامعا بايلانىستى بۇگىن ۇلتتىق بانكتەگىلەر دە مالىمدەمە جاسادى، - دەپ حابارلايدى Qamshy.kz كتك ارناسىنا سىلتەمە جاساپ.
اقشا ايىرباستاۋ ورىندارىنىڭ ارانى ناعىز ەندى اشىلعان سەكىلدى. بيرجاداعى باعا كەشە 350 تەڭگەگە دەيىن كوتەرىلگەن كەزدە، كوشەدەگى قولما-قول ساۋدا بىردەن 360-قا ءبىر-اق جەتتى. بۇل ءبىرازدان بەرى ساۋداسى سايابىرسىپ، قولى جۇرمەي قالعان الىپساتارلاردىڭ قولدان جاساعان ايلاسى دەيدى ساراپشىلار.
مەرۋەرت ماحمۇتوۆا، ساراپشى:
-دوللار ساۋداسىندا كەشە ورتا دەڭگەيى 352 تەڭگە 1 دوللار ءۇشىن بولدى. ايىرباستاۋ پۋنكتتارى ونى 359-360-قا دەيىن كوتەرىپ جىبەردى. ايىرباستاۋ ورىندارى مەنىڭ ويىمشا پايدانى ويلاعان.
ۇرىمتال ءساتتى ۇتىمدى پايدالاعان ساتۋشىلار تۇنگە قاراتا دوللاردى ءتىپتى 364 تەڭگەگە ساتىپتى. ال بيرجاداعا قازىرگى باعام - 352. وسىنداي تومەن باعامەن ۆاليۋتا العاندار ۇستىنە نەبارى 2 تەڭگە قوسىپ ساتىپ جاتىر. ال ەلدىڭ باس بانكى ەجەلگى ادەتىنە سالىپ، بۇل جولى دا باعامنىڭ ءوسۋىن مۇنايمەن بايلانىستىردى.
ءادىل مۇحامەدجانوۆ، ق ر ۇب مونەتارلىق وپەراسيالار دەپارتامەنتى ديرەكتورىنىڭ ورىنباسارى:
-«اعىمداعى جىلدىڭ شىلدەسىندە مۇناي باعاسىنىڭ تومەندەۋى، مۇناي ونىمدەرى نارىعىنداعى ۇسىنىس كولەمىنىڭ ءوسۋى، اقش-تاعى مۇنايدىڭ جەتكىلىكتى قورى تۋرالى دەرەكتەردىڭ جاريالانۋى، سونداي-اق اقش-تاعى بۇرعىلاۋ ۇڭعىمالارى سانىنىڭ ۇلعايۋى - 2016 جىلعى 26 شىلدەدە تەڭگەنىڭ 350.2 دەڭگەيگە دەيىن السىرەۋىنە سەبەپ بولدى.»
ۇلتتىق بانكتىڭ تىلشىلەرگە تاراتقان تىلدەي پاراعىندا قايتا-قايتا قۇنسىزدانىپ، سەنىمنەن جۇرداي بولعان ۆاليۋتاعا قاتىستى جۇباتارلىق جايت جوق. ويتكەنى، ەكونوميكانىڭ جالعىز ارقاسۇيەرى - وندەلمەگەن مۇناي ءوندىرىسى دە ءبىرشاما تومەندەگەن.
ءبىر جىلدىڭ ىشىندە Brent ماركالى مۇنايدىڭ ورتاشا باعاسى الەمدىك نارىقتا 22،2%-عا تومەندەپ،ماۋسىم ايىندا 48،5$ قۇرادى. تاۋ-كەن ءوندىرۋ سالاسىندا ءوندىرىستىڭ كولەمدەرى 2016 ج. قاڭتار-ماۋسىمىندا 2015ج. قاڭتار-ماۋسىمىمەن سالىستىرعاندا ناقتى كورسەتكىشتە 3،4%-عا تومەندەگەن. بۇل تەڭگەنىڭ ايىرباستاۋ باعامىنىڭ السىرەۋىنە سەبەپ بولدى.
ەكسپورتتىڭ ءبىراز بولىگى ەۋرووداق ەلدەرىنە جەتكىزىلەتىندىكتەن، ەكونوميكامىز ونداعى احۋالعا دا تىكەلەي تاۋەلدى ەكەن. ءبىراق ونداعى جاعداي دا ازىرشە ءماز ەمەس دەيدى ۇلتتىق بانكتەگىلەر. دەگەنمەن، ساراپشىلار الداعى ۋاقىتتا تەڭگەنىڭ ايتارلىقتاي السىرەمەيتىنىنە سەنىمدى. ويتكەنى، ىشكى نارىقتاعى قاتىسۋشىلار قالاي دەگەنمەندە ءوزارا تەڭگەمەن ەسەپ ايىرىسادى.
پىكىر قالدىرۋ