الماتىدا ءبىر ءوزى 8 ادامدى جارالاپ، التى ادامدى اتىپ ولتىرگەن رۋسلان كۇلىكبايەۆ، وسىعان دەيىن جاساعان قىلمىستارى ءۇشىن، جازاسىن وتەۋ كەزىندە ەكى مارتە ينە، ءبىر رەت تەمىر جۇتىپ، ءوزىن-وزى  ولتىرۋگە ارەكەت جاساعان كورىنەدى. الايدا، ونى تۇرمە قىزمەتكەرلەرى قۇتقارىپ قالعان. بۇل تۋرالى كۇلىكبايەۆتىڭ ايەلى اياۋلىم ۇمبەتقۇلوۆا مالىمدەدى، - دەپ حابارلايدى Qamshy.kz 31-ارناعا سىلتەمە جاساپ.

اياۋلىم ۇمبەتقۇلوۆا، رۋسلان كۇلىكبايەۆتىڭ ايەلى:

- ەسىمدە ءبىر جىلاپ ايتىپ بەرگەنى. مەن تۇرمەدە قاتتى قيىنشىلىق كوردىم دەدى. ەكى ينە جۇتتىم دەدى. ءبىر ينەمدى الدى دەدى. وپەراسيامەن ءبىر ينەسىن الدى دەدى. بىرەۋى ىشىندە. كۆارتيرادا سوڭعى رەت تۇرعانىمىزدا تالاي سكورىي شاقىرعانبىز. جۇرەگى قىسىلىپ دەمالا الماي قالاتىن.

ءتىپتى، اياۋلىم ۇمبەتقۇلوۆا، ءوزىنىڭ بۇل ءسوزىنىڭ دالەلى رەتىندە - كۇلىكبايەۆتىڭ دەنەسىندە ءبىر وتادان قالعان تىرتىق بارىن ايتادى. ياعني، اينالاسى جارتى ساعاتتىڭ ىشىندە قولىندا قارۋى بار قانشاما پوليسەيدى  اتىپ ولتىرگەن كۇدىكتى، بۇل قاندىقول قىلمىسىنىڭ جوسپارىن تۇرمەدە وتىرىپ قۇرعان با؟ پوليسيا قىزمەتكەرلەرىن وشپەندىلىكپەن ولتىرەتىندەي، كۇدىكتىنىڭ تۇرمەدە قانداي قيىندىق كورۋى مۇمكىن؟ ەگەر ول  كەك الۋدى كوكسەسە، وعان لاڭكەستىكتىڭ قانداي قاتىسى بار؟  ال، رۋسلان كۇلىكبايەۆتىڭ  الدىمەن ءوزىن ولتىرەتىنىن ەسكەرتىپ، ارتىنشا ارنايى بارىپ اتىپ ولتىرگەن جەڭىل ءجۇرىستى قىز كىم؟