قازاقستاندىق بەلگىلى دومبىراشى اسىلبەك ەڭسەپوۆ ۇيلەندى، - دەپ حابارلايدى Qamshy.kz Tengrinews.kz - كە سىلتەمە جاساپ.
توي 6 تامىزدا ءوتتى. 36 جاستاعى مۋزىكانت ايجان ەسىمدە قىزبەن ۇيلەنىپتى. تويدا دوستارى، شوۋمەن نۇرتاس ادامبايەۆ، "مۋزارت" توبىنىڭ سوليستەرى، ءانشى تامارا اسار جانە كومپوزيتور رەنات گايسين بولدى.
دومبىراشى اسىلبەك ەڭسەپوۆ 1980 جىلى اقتوبەدە دۇنيەگە كەلگەن. جۇبانوۆ اتىنداعى مۋزىكا مەكتەبىن ءتامامداعان. كوپتەگەن فەستيۆالدار مەن كونكۋرستاردىڭ لاۋرەاتى اتانعان. 1992 جىلى "جاڭا ەسىمدەر" مادەني قورىنىڭ ستيپەنديانتى اتاندى. 1999 جىلى "جىل ءانى - التىن ديسك" تەليەۆيزيالىق فەستيۆالىنىڭ "جىل جاڭالىعى" اتالىمىن جەڭىپ الدى. 2004 جىلى "تارلان" سىيلىعىنىڭ، ال 2005 جىلى "دارىن" سىيلىعىنىڭ يەگەرى اتانعان.
