جاپونيادا كوشەدە شىنا­شاعى كەسىلگەن كىسى كورسە ونىڭ ياكۋدزا توبىنان ەكەندىگىن بىردەن بىلەدى. قىلمىستىق توپ مۇشەسىنىڭ ءوزىنىڭ شىناشاعىن شاۋىپ تاستاۋى ار جولىنداعى سامۋرايدىڭ ۇستا­نى­مىمەن بايلانىستى ەكەن. مافيالىق توپتىڭ ادامى ەكەندىگىن دەنەسىندەگى تاتۋيروۆكا تاڭباسىنا قاراپ تا بىلەدى. وسىنداي ەرەكشەلىكتەرى بولماسا جاپون مافياسىنىڭ امەريكا، يتاليا، سينگاپۋر، وڭتۇستىك كورەياداعى قىلمىستىق كلانداردان وزگەشەلىگى جوق. قايسى توپ بولسىن، كىشىسى ۇلكەنىنە باعىناتىن، مافيالىق قاعيدالاردى بەرىك ۇستاناتىن جۇيە ەكەنى كورىنەدى. باسقا ەلدەردىڭ مافيالىق توپتارى ەل كوزىنەن تاسا بولسا، جاپونيادا كەرىسىنشە كوز الدىدا. ياكۋدزا مۇشەلەرى قوعامنان جاسىرىنبايدى. كەيبىر دەرەك كوزدەرىنە سەنسەك، ياكۋدزانىڭ جىلدىق تابىسى 1 ترلن. يەن بولادى ەكەن. كىرىستىڭ تەڭ جارتىسى ناركوبيزنەستەن تۇسەدى. 

1951 جىلى «ناشاعا تىيىم سالۋ» جونىندەگى زاڭ قابىلداندى. فيلوپون وندىرەتىن جۇزدەگەن حيميالىق لابوراتوريالار جابىلدى. سوعان قاراماستان 1960 جىلدارى مافيا گەروين ساۋداسىن كۇشەيتتى. 1964 جىلى توكيو وليمپيا­داسى قارساڭىندا ۇكىمەت ناشاعا قاتىستى قاتاڭ شارالار قابىلدادى. ناشانىڭ ساۋدا تورى جويىلدى. تابىس كوزىنەن ايرىلعىسى كەلمەگەن ياكۋدزا وڭتۇستىك كورەيامەن بايلانىس­تى نىعايتادى. ەلدە ناشاقورلار سانى وسەدى. 1985 جىلى جاپونيا ۇكىمەتى وڭتۇستىك كورەيا تاراپىمەن ناشاقورلىققا قارسى كۇرەس جۇمىستارىن جەتىلدىرەدى. بۇل كەزدە ەلدە گەروين، كوكاين، ماريحۋاناسىز كۇن كورە المايتىنداردىڭ سانى ءوسىپ كەتكەن ەدى. «بۇل جونىنەن جاپونيا 30 جىل بۇرىنعى امەريكانى كوز الدىعا اكەلەدى» دەيدى ماماندار. جىل سايىن جاپون پوليسياسى 25 مىڭ ناشا ساتۋشى مەن تۇتىنۋشىنى قۇرىقتايدى ەكەن. 

ياكۋدزانىڭ مۇمكىندىگى ناشامەن شەكتەلمەسە كەرەك. ول پورنوگرافيا، ادام ساۋداسى، اۆتوموبيل ساۋداسىمەن اينالىسادى. رەسەي ماماندارى قيىر شىعىسقا ەسكى جاپون اۆتوموبيلدەرىن تاسۋ ىسىنە دە ياكۋدزا قاتىستى دەپ ەسەپتەيدى. جاپونيا تەرروريزم قاۋپىنەن ادا ەمەس. «اۋم شينريكيو» تەرروريستىك سەكتاسىنىڭ ارەكەتتەرى الاڭداۋشىلىق تۋعىزۋدا. تاريحتاعى تەررورلىق ارەكەتتەردىڭ ءبىرى رەتىندە 1995 جىلدىڭ 20 ناۋرىزىندا توكيو مەتروسىندا ورىن العان وقيعانى ايتۋعا بولادى. ۋلانۋ ناتيجەسىندە 13 كىسى مەرت بولىپ، 6000-نان استام ادام جارالانعان. پوليسيا بۇل سەكتانىڭ 200-دەن استام مۇشەسىن قۇرىقتادى. سوت 2004 جىلى سەكتا جەتەكشىسى شيوكو اساحارانى دارعا اسۋ تۇرىندەگى ەڭ اۋىر جازاعا كەستى. بۇل جازا وسى ۇيىمنىڭ 12 مۇشەسىنە قاتىستى دا قابىلداندى. ءۇش مۇشەسىنە حالىقارالىق ىزدەۋ جاريالانىپ، 5 ميلليون يەن كولەمىندەگى سىياقى تاعايىندالدى. 

جاپون پوليسياسىندا 2330 قىلمىستىق توپقا بولىنگەن 90 مىڭ قىلمىسكەر تىركەۋلى. ويىن بيزنەسى، قارۋ-جاراق ساۋداسى، ناركوبيزنەس جانە پورنوگرافيا مافيانىڭ قوزعاۋشى كۇشىنە اينالعان. 

شارافات جىلقىبايەۆا