بۇگىندە كورشى مەملەكەتتەردىڭ ءوزى وڭتۇستىكتىڭ كوكونىسىن ساتىپ الۋعا قۇمار. ءتىپتى، رەسەيدىڭ حاباروۆسك، ءنوۆوسىبىر، بارناۋىل، كراسنويارسك جانە تاتارستان وڭىرلەرى كۇنگەيدىڭ كوكونىسى مەن جەمىس-جيدەك ونىمدەرىنە تاپسىرىس بەرۋدى ۇلعايتقان.

وسىعان وراي، كورشى ەلدەگى ساۋدا جەلىسىن قۇرعان كاسىپكەرلەر جەرگىلىكتى شارۋاشىلىق جەتەكشىلەرىمەن كەزدەسىپ، بىرگە جۇمىس ىستەۋدىڭ جولدارىن دا قاراستىرعان بولاتىن. باسقوسۋعا ۇيىتقى بولعان وڭتۇستىك قازاقستان وبلىسى كاسىپكەرلەر پالاتاسى جەرگىلىكتى كاسىپ يەلەرىنىڭ مۇددەسى تۇرعىسىنان بار امالدى قولعا العانىن ايتۋ كەرەك.

بۇگىندە كۇنگەيدە 2500-دەي شارۋاشىلىق نىساندارى جۇمىسىن جۇيەگە قويىپ ۇلگەرگەن. ونىڭ ىشىندە كوكونىس، باقشا ونىمدەرىن وندىرەتىندەرى دە بارشىلىق. ال ءقازىر، ءونىمنىڭ پىسكەن شاعىندا كورشى رەسەيدىڭ قالالارىنا جونەلتىلىپ جاتقان كوكونىس، باقشا ونىمدەرىندە ەسەپ جوق.

اسىرەسە، قاۋىن-قاربىزدىڭ دەنى سول جاققا قاراي تاسىمالدانۋدا. بۇعان دەيىن الماتى مەن تالدىقورعاندىق كاسىپكەرلەرمەن جۇمىس ىستەپ كەلگەن رەسەيلىكتەر وسى تاجىريبە نەگىزىندە جىل ون ەكى اي جەرگىلىكتى تاۋارلاردى ساۋدا جەلىسى ارقىلى رەسەي قالالارىنا وتكىزۋگە كەلىسكەن.