مەكتەپ وقۋشىلارىنا جاپپاي ءبىر ۇلگىدە كيىنۋ تۋرالى تالاپ قويىلمايدى. ءبىلىم جانە عىلىم مينيسترلىگىنىڭ وكىلدەرى مەكتەپ فورماسىنا قاتىستى وسىنداي تۇسىنىكتەمە بەرىپ وتىر.، - دەپ حابارلايدى Qamshy.kz استانا تەلەارناسىنا سىلتەمە جاساپ.

ياعني ەلىمىزدە ءبىرىڭعاي فورما جۇيەسى ەنگىزىلگەنىمەن، ونىڭ ۇلگىسىن تاڭداۋ ءبىلىم وردالارىنىڭ قالاۋىنا بەرىلگەن. بۇل ءۇردىس الداعى ۋاقىتتا دا سولاي قالا بەرمەك. ايتا كەتەيىك، سوڭعى ۋاقىتتا «ەلدەگى مەكتەپ وقۋشىلارىنىڭ بارلىعى بىردەي كيىنۋى ءتيىس» دەگەن اقپار تاراعان ەدى.

جاڭا وقۋ جىلى جاقىنداعان سايىن قاربالاس كۇيگە تۇسەتىن اتا انا كوپ، سولاردىڭ ءبىرى - استانالىق كاريما شوڭعارايەۆا. تۇڭعىش نەمەرەسى اجار ءبىرىنشى سىنىپقا بارماق. كىتاپ-داپتەرى مەن سومكەسى رەتتەلگەن. ەندى مەكتەپ فورماسىن الۋ كەرەك. بيىل № 65 مەكتەپتىڭ وقۋشىلارى ءۇشىن تريكوتاجدان تىگىلگەن كيىم ۇلگىسى تاڭدالىپتى. 

ءبىر اي بۇرىن تاپسىرىس بەرگەنبىز. ەندى دايىن كيىمدى الايىق دەپ تۇرمىز. جاقسى كيىمى، وتە جاراسىپ تۇر. ادەمى. تاعى باسقا كيىمدەر الامىز. ءالى ەكى كويلەگى، سپورت كيىمى بار. شامامەن ەندى 50-60 مىڭعا بارادى، - دەيدى استانا قالاسىنىڭ تۇرعىنى كاريما شوڭعارايەۆا. 

ەڭ باستىسى - كيىم ىڭعايلى. سوندىقتان اجەي نەمەرەسىنەن قاراجاتتى اياپ قالعىسى جوق. جالپى سوڭعى 10 جىلدان بەرى ەلىمىزدە ءاربىر مەكتەپتىڭ وزىندىك فورماسى بار. باستى شارت - كلاسسيكالىق ۇلگىدەن اۋىتقىماۋى ءتيىس. مىنا شاعىن سەح استاناداعى 15 مەكتەپتەن تاپسىرىس العان. 

ءار مەكتەپكە جاڭا ۇسىنىستارىن ەنگىزۋگە تىرىستىق. ءبىراق كوپ مەكتەپتەر ءوزىنىڭ ەسكى فورماسىندا قالعىسى كەلدى. باعا جاعىن ايتاتىن بولساق، ءبىز بۇكىل شيكىزاتتى شەتەلدەن الىپ كەلەمىز. سوندىقتان باعا دا وزگەرەدى. بىلتىر 13 مىڭ 900 بولسا، بيىل 16 مىڭ 700-دەن. كومپلەكتتەر. وعان كوفتا تريكوتاجدى، جيلەت، سوسىن شالبار نەمەسە يۋبكا كىرەدى، - دەيدى دۇكەن جەلىسىنىڭ ديرەكتورى بەيبىت قۇلشىبايەۆا.

سوڭعى ۋاقىتتا ب ا ق بەتتەرىندە "ەلىمىزدە وقۋشىلار فورماسى ءبىرىڭعاي جۇيەگە كوشەدى ەكەن" دەگەن اقپاردىڭ تاراپ جاتقانى بار. ءتىپتى عالامتوردا ونىڭ العاشقى سىزباسى دا كورسەتىلگەن. ءبىراق بۇل مالىمەتتى ءبىلىم جانە عىلىم مينيسترلىگى جوققا شىعاردى. ۆەدومستۆو وكىلى، وقۋشىلاردىڭ كيىم ۇلگىسى ءالى دە ءاربىر مەكتەپتىڭ ىشكى تاڭداۋى، دەيدى. 

ءبىرىڭعاي مەكتەپ فورماسىن ەنگىزۋ كوزدەلمەگەن. مەكتەپ فورماسىن ەنگىزۋ مەكتەپ ۇيىمىنىڭ جانە اتا-انالاردىڭ قۇزىرەتىندە. سول سەبەپتەن ءار مەكتەپتە مەكتەپ فورماسى ەرەكشە بولادى، - دەيدى ق ر ءبىلىم جانە عىلىم مينيسترلىگى دەپارتامەنت باسشىسىنىڭ مىندەتىن اتقارۋشى قالكەن جاكين.

دەگەنمەن، مينيسترلىكتىڭ دە وزىندىك تالابى جوق ەمەس. ءتيىستى ەرەجەلەرگە سايكەس، مەكتەپ فورماسىندا ۇشتەن ارتىق ءتۇستىڭ ارالاسپاۋى شارت. اللەرگيالىق اۋرۋلار قوزدىرمايتىن، كلاسسيكالىق ۇلگىدەگى، جىلى، ءارى قوزعالۋعا ىڭعايلى ماتادان تىگىلۋى ءتيىس. وزگەسى اتا-انانىڭ قالاۋىندا. ماسەلەن، №65 مەكتەپتىڭ اتا-انالار كەڭەسى بيىل تاڭداۋدى ساپا مەن باعاعا جاساپتى.  

اتا-انالار كەڭەسىنەن 7 ادام كىردى. ءسويتىپ، قارا-كوك ءتۇستى كيىمدى تاڭدادىق. ول - شارشاۋدى باساتىن ءتۇس. ماتا دا جاقسى. ەڭ باستىسى - باعاسى قولجەتىمدى. ويتكەنى بىرەۋدىڭ شاماسى بار، بىرەۋدىكى جوق دەگەندەي. 3-4 بالاسى بارلارعا تىپتەن قيىن. مەنىڭشە، وقۋشىلار بىر-بىرىنەن ەرەكشەلەنبەۋى ءتيىس، - دەيدى №65 مەكتەپ اتا-انالار كەڭەسىنىڭ ءتورايىمى نۇرگۇل قۇسپانوۆا.

بۇگىندە مەكتەپ فورمالارى بازارلار مەن جارمەڭكەلەرگە دە شىعارىلعان. ءبىراق مۇندا دا قالاعانىن تاپپاي جۇرگەن  اتا-انالار قاۋىمى جەتەرلىك ەكەن. كوپشىلىگى البەتتە باعانىڭ تىم قىمباتتىعىن العا تارتادى. ال وقۋ مەرزىمى بولسا، باستالۋعا تاياپ قالدى.