الماتىدا ۇلتتىق باسپا ءسوز كلۋبى عيماراتى ءسۇرىلىپ جاتىر، - دەپ حابارلايدى Qamshy.kz Tengrinews.kz - كە سىلتەمە جاساپ.

وسىعان دەيىن، ءبىرىنشى ينستانسياداعى سوتتىڭ شەشىمىمەن ۇلتتىق باسپا ءسوز كلۋبى جانە "قازتاگ" حاا ورنالاسقان عيماراتتىڭ 3 جانە 4 قاباتتارى سەيسميكالىق ءقاۋىپتى دەپ تانىلعان. 

سوت ورىنداۋشى ارنۇر باقىتبەرگەننىڭ ايتۋىنشا، ءسۇرىلۋ تۋرالى سوت شەشىمى زاڭدى كۇشىنە ەنگەن. باقىتبەرگەن ۇلتتىق باسپا ءسوز كلۋبىنا ءوز ەركىمەن سۇرۋىنە ءبىر اي ۋاقىت بەرىلگەن، الايدا ولار ءسۇرۋ جۇمىستارىن باستاماعانىن ايتتى. "30 ماۋسىمدا بىزگە ءوز ەركىمەن ءسۇرۋ تۋرالى قۇجات كەلىپ ءتۇستى، سودان كەيىن ولار ءوز ەركىمەن بۇزاتىنىن ايتتى. تاعى دا ۋاقىت سۇرادى. قازىرگى كەزدە كۇشتەپ ءسۇرۋ جۇمىستارى جۇرگىزىلىپ جاتىر. ولارعا ەكى اي مەرزىم بەرىلدى"، - دەدى سوت ورىنداۋشى. ول ارنايى تەحنيكانىڭ تارتىلماعانىن جانە ازىرگە جۇمىستار ادام قولىمەن جۇرگىزىلىپ جاتقانىن ايتتى. سونداي-اق، سوت ورىنداۋشىنىڭ ايتۋىنشا، ءسۇرىلىپ بولعاننان كەيىن عيماراتتىڭ يەسىنە جۇرگىزىلگەن جۇمىستار ءۇشىن ەسەپ-شوت تابىستالادى ەكەن.

ءوز كەزەگىندە، ۇلتتىق باسپا ءسوز كلۋبىنىڭ وكىلى اسقار ماتايەۆتىڭ ايتۋىنشا ولار ءسۇرىلۋ جۇمىستارىنا دايىن بولعان. "قازىرگى كەزدە عيمارات بوس تۇر. ءبىز بۇل شەشىمگە دايىن بولعانبىز، سوندىقتان بارلىق زاتتاردى باسقا جەرلەرگە كوشىردىك. (...) سوت شەشىمى بار. نەگىزىندە عيماراتتىڭ سالىنۋى تۋرالى بارلىق قۇجاتتار بار. سوت شەشىم شىعاردى، الايدا بارلىق قۇجاتتار رەتتەلگەن جانە زاڭداستىرىلعان. ءبىرىنشى جانە ەكىنشى قاباتتار 50ء-شى جىلدارى سالىنعان، 2006 جىلى جوندەۋدەن وتكەن. مۇنى سەيسمو ءقاۋىپتى دەپ سانايدى. ءبىز قازىرگى كەزدە وسى ءىستىڭ قايتا قارالۋى ءۇشىن جوعارى سوتقا شاعىمداندىق"، - دەدى ماتايەۆ.