20 تامىزدا دۇنيەجۇزىلىك گۋمانيتارلىق كومەك كۇنىنىڭ قۇرمەتىنە ىلە الاتاۋىنداعى فۋرمانوۆ شىڭىنا (3053 مەتر) شاپشاڭ جۇگىرىپ شىعۋدان جارىس وتكىزىلدى، - دەپ حابارلايدى Qamshy.kz.

مەدەۋ ماڭىنداعى كىم اسار شاتقالىنان باستالعان سپورتتىق جارىسقا 200 ادام قاتىستى. ونىڭ 45ء-ى كاسىبي سپورتشى بولسا، قالعاندارى اۋەسقويلار. شارانى ۇيىمداستىرۋعا بىرىكەن ۇلتتار ۇيىمىنىڭ كاۆكاز، ورتا ازيا ەلدەرى جانە ۋكراينا جونىندەگى گۋمانيتارلىق ماسەلەلەردى ۇيلەستىرۋ باسقارماسى، ق ر سكايراننينگ فەدەراسياسى، ق ر قىزىل جارتى اي قوعامى جانە الماتى قالاسى توتەنشە جاعدايلار جونىندەگى دەپارتامەنتى اتسالىستى.

جارىس قورىتىندىسى بويىنشا قاتىسۋشىلارعا سەرتيفيكاتتار تاپسىرىلىپ،  كاسىبي سكايراننينگ شەبەرلەرى مەن كاسىپقويلار جاس كاتەگورياسى بويىنشا جەكە-جەكە ماراپاتتالدى.

جارىس سوڭىندا الماتى قالاسى توتەنشە جاعدايدار دەپارتامەنتىنىڭ ماماندارى مەن قۇتقارۋ قىزمەتىنىڭ وكىلدەرى قاتىسۋشىلار اراسىندا العاشقى كومەك كورسەتۋ بويىنشا ترەنينگ وتكىزدى. سونداي-اق الماتى قالاسى توتەنشە جاعدايلار دەپارتامەنتىنىڭ قۇتقارۋعا ارنالعان ارنايى  تەحنيكاسىنىڭ تانىستىرىلىمى بولدى.

الماتى قالاسى تۇرعىندارى مەن قوناقتارى اراسىندا سالاۋاتتى ءومىر سالتىن ناسيحاتتاۋ، توتەنشە جاعداي ورىن العان جاعدايدا قاۋىپسىزدىك شارالارىن ءبىلۋ مەن العاشقى كومەك كورسەتۋ قابىلەتىن ارتتىرۋ ماقساتىندا وتكىزىلگەن سپورت جارىسىنا «الماتى بەگەموت» Gippo كومپانياسى دەمەۋشىلىك جاسادى.  

دۇنيەجۇزىلىك گۋمانيتارلىق كومەك كۇنى بۇۇ-نىڭ باس اسسامبلەياسىنىڭ باستاماسىمەن  2008 جىلى جاريالانعان. جىل سايىن 19 تامىزدا اتالىپ وتىلەتىن بۇل كۇنى الەم قاۋىمداستىعى كاسىبي مىندەتىن اتقارۋ بارىسىندا قازا تاپقانداردى ەسكە الىپ،  مۇقتاج جاندارعا كومەك كورسەتكەندەرگە العىس ايتادى. بۇل كۇن، سونداي-اق قىرىقتان استام مەملەكەتتەگى ميلليونداعان اش ادامداردى، ناۋقاستار مەن زورلىق-زومبىلىقتان جاپا شەگۋشىلەردى ەسكە تۇسىرەتىن كۇن رەتىندە  دە بەلگىلى.

شارافات جىلقىبايەۆا