وڭتۇستىك قازاقستاندا استىق ورۋ ناۋقانى باستالدى. وبلىسىمىزدا بيىل استىق ورۋ جۇمىستارى وتكەن جىلمەن سالىستىرعاندا 10-15 كۇنگە ەرتە قولعا الىنىپ وتىر. جالپى ايماقتا 195 مىڭ گەكتارعا ماساقتى داقىلدار ەگىلگەن بولسا، ونىڭ 156،7 مىڭ گەكتارى بيداي، ال 38،3 مىڭ گەكتارى ارپا.

ەگىنگە العاشقى وراقتى قازىعۇرتتىق شارۋالار سالدى. اتالعان اۋداندا 34 مىڭ گەكتارعا جۋىق جەرگە بيداي ەگىلسە، 3،2 مىڭ گەكتارىنا ارپا ەگىلگەن.

بۇگىندە العاشقى وراقتى «امانكەلدى» ج ش س بيداي جانە ارپا ورۋ جۇمىستارىن 1،5 مىڭ گا جەردە جۇرگىزۋدە. مەملەكەت تاراپىنان دەر كەزىندە بەرىلگەن قولداۋلاردىڭ ارقاسىندا وتكەن جىلمەن سالىستىرعاندا مۇندا داقىلداردىڭ ورتاشا ءتۇسىمى 20% جوعارى. قوجالىق باسشىسى ن.قۇرالوۆتىڭ ايتۋىنشا، استىقتى جيناپ الۋ جۇمىستارىنا 15 كومباين مەن 12 كاماز جۇك كولىگى جۇمىلدىرىلعان. ال دايىن 30 مىڭ توننا بيدايدى اۋعانستان، يران جانە وزبەكستان مەملەكەتتەرىنە ەكسپورتتاۋعا كەلىسىمدەر جاسالىپ قويىلعان.

ايتا كەتەيىك، تاۋار وندىرۋشىلەرگە جەڭىلدەتىلگەن باعامەن بەرىلەتىن مينەرالدى تىڭايتقىشتىڭ كولەمى وتكەن جىلمەن سالىستىرعاندا 4 مىڭ تونناعا ارتىپ، 80 مىڭ توننانى قۇرادى.
كوكتەمگى دالا جۇمىستارىنا بولىنگەن 38 مىڭ توننا جانار-جاعار مايدىڭ 37،2 مىڭ تونناسى بوساتىلدى.

ماساقتى داقىلداردىڭ الدىن-الا جاسالىنعان بولجامدىق ەسەبى بويىنشا 195 مىڭ گا القاپتىڭ ءار گەكتارىنان 22 سەنتنەردەن جالپى 430 مىڭ توننادان اسا ءونىم الىنادى دەپ كۇتىلۋدە.
جالپى العاندا وسى جىلى اۋىل شارۋاشىلىعى داقىلدارىنىڭ ەگىس كولەمى وتكەن جىلمەن سالىستىرعاندا 4 مىڭ گا ارتىپ، 780 مىڭ گا قۇرايدى.