ۇلتتىق قاۋىپسىزدىك كوميتەتىنىڭ باسشىسى ۆلاديمير جۇماقانوۆ الماتى وبلىسىندا لاڭكەستىك جاساماق بولدى دەگەن كۇدىكپەن تۇتقىندالعان ءتورت ازاماتتىڭ دا سالافيزم اعىمىن ۇستانۋشىلار ەكەنىن مالىمدەدى، - دەپ حابارلايدى Qamshy.kz.

ول بۇل تۋرالى استانادا ءوتىپ جاتقان كونفەرەنسيا كەزىندە ايتقان.

«ءتورت ادام ۇستالدى. بىرەۋى – قىرعىزستان ازاماتى. «لاڭكەستىك ۇيىم قىزمەتىنە قاتىسۋ» بابى بويىنشا قىلمىستىق ءىس قوزعالدى. ءقازىر ولار قاماۋعا الىندى، تەرگەۋ ارەكەتتەرى ءجۇرىپ جاتىر (...). ولار سالافيزم يدەولوگيالىق اعىمىن ۇستانادى»، - دەگەن ۆ. جۇماقانوۆ.

بۇدان بولەك، ۇقك باسشىسى جەكەلەگەن ءدىني اعىمدار قىزمەتىنە تىيىم سالۋ جونىندەگى ويلارىن دا بىلدىرگەن.

«بۇل ماسەلە قاراستىرىلىپ جاتىر. جاقتاۋشىلار دا، قارسى شىعۋشىلار دا بار. ويتكەنى، يدەولوگياعا تىيىم سالۋ قيىن ءىس. ءبىراق، تىيىم سالۋعا بولادى. بايقاساڭىزدار، 2011 جىلدان بەرى بىزدە بولعان بارلىق وقيعالار بەلگىلى ءبىر دەڭگەيدە وسى يدەولوگيامەن بايلانىستى بولىپ وتىر. سوندىقتان، وسىنداي ۇسىنىس ايتىلۋدا. جاقىن ۋاقىتتا ول ۇسىنىستار ەڭ جوعارى دەڭگەيدە قاراستىرىلادى دەپ ويلايمىن (...). بۇل نە دەگەنمەن بيلىك پەن قوعامنىڭ ماسەلەسى. سوندىقتان، كورە جاتارمىز. كوپ كۇتتىرمەي قارالاتىن بولادى. جاقىن ۋاقىتتا وسى ماسەلە مەملەكەت باسشىسى دەڭگەيىندە، قاۋىپسىزدىك كەڭەسىندە قارالادى دەپ ويلايمىن، سوندىقتان، بولاشاقتا بۇل ماسەلەنىڭ بارلىعى شەشىمىن تابادى»، - دەگەن ۇقك باسشىسى.

ەستەرىڭىزگە سالساق، بۇعان دەيىن الماتى وبلىسىنىڭ اۋماعىندا لاڭكەستىك ارەكەت جاساماق بولدى دەگەن كۇدىكپەن ءتورت ازامات ۇستالعان بولاتىن.