ءبىزدىڭ اۋىلدا ەردەن (ەسىمى بەلگىلى سەبەپتەرمەن وزگەرتىلدى) دەگەن سپورتشى بولعان. كەڭەس ۇكىمەتى كەزىندە ۇلتتىق سپورتتان رەسپۋبليكالىق جارىستاردا جەڭىپ جۇرگەن ەلگە بەلگىلى ادام ەكەن. جاس كەزىندە ات قۇلاعىندا ەركىن ويناعان اقساقالدىڭ ومىرىندە ءبىر ۇلكەن وكىنىش بار كورىنەدى. ونى سول ەردەن اتانىڭ ءوز اۋزىنان ەستىگەن اجەم ايتىپ ەدى.
كەڭەس ۇكىمەتى كەزىندە جەزوكشەلەر ءۇيى، جەزوكشەلەر ۇياشىعى، جالپى جەزوكشە دەگەن ۇعىم قازىرگىدەي كەڭ تارالماعان ەدى عوي. تەك ەركەكتەردىڭ كەيبىر جولداسى جوق ايەلدەرگە باراتىنى بولماسا، وتباسى ءقۇندىلىقتارى بەرىك ساقتالعان كەزەڭ ەمەس پە ەدى؟ ەردەن ءوزى پالۋان، ءوزى شىمىر، كەلىستى جىگىت، بۇكىل اۋىل سىيلايتىن ازامات ەدى. ءبىراق ول سول اۋلىداعى ءبىر جالعىز باستى، ەل «بۇزىلعان قاتىن» اتاپ كەتكەن باعيلا دەگەن ايەلگە بارادى ەكەن كەيدە.
بىردە ەردەن سپورتتىق جارىستان جەڭىپ، بۇكىل وداقتىق جارىسقا باراتىن بولىپتى. جارىس وداقتاس رەسپۋبليكالاردىڭ بىرىندە وتەدى ەكەن. سودان وداقتىق جارىسقا باراتىنىنا ماساتتانعان سوڭ با، نەگە ەكەنى ەردەن جولعا شىعاتىن كۇنى باعيلانىڭ ۇيىنە تۇنەپتى. الىس جولعا سول باعيلانىڭ ۇيىنەن اتتانىپتى. سونىمەن نە كەرەك، تاۋلى رەسپۋبليكالاردىڭ بىرىندە وتكەن بۇكىل وداقتىق جارىستا ەردەن قارسىلاسىنان وڭباي جەڭىلەدى. ونىمەن قويماي، ەلگە ەڭسەسى ءتۇسىپ، ءبىرتۇرلى بوپ ورالادى. سودان كەيىن ەردەننىڭ سپورتتاعى جولى جۇرمەيدى. كەزدەسكەن قارسىلاستىڭ بارىنەن جەڭىلە بەرەدى. ءسويتىپ، سپورتتى ءبىرجولاتا تاستاعان ەكەن.
«قاراقتارىم، وتباسى تازالىعىن ساقتاڭدار. جارلارىڭا ادال بولىڭدار. مەن ومىرىمدە ۇلكەن قاتەلىك جاسادىم. جارىسقا باراردا بۇزىلعان ايەلدىڭ ۇيىنە تۇنەپ، سودان جولىم بايلاندى. ودان كەيىن قانشا تالپىنسام دا سپورتتاعى جولىم جۇرمەي قويدى. ەر ادام جەكە باس تازالىعىن ساقتاپ ءجۇرۋ كەرەك» دەپ، قارتايعان شاعىندا باتا سۇراپ بارعان جاس جىگىتتەرگە وسيەت ەتىپ ايتىپ وتىرادى دەيدى، ەردەن اقساقال...
ايعانىم ءبىرتۋار
