اقتوبەدەگى تەراكت كەزىندە كۇدىكتىلەر قاتارىنا ىلىنگەن ءاعالى-ىنىلى سامات پەن سانات قوجانيازوۆتار وبلىستىق ءىىد-نى سوتقا بەردى. ولار قۇقىق قورعاۋ ورگانىنىڭ وزدەرىن اقتاپ، مورالدىق شىعىن تولەگەندەرىن تالاپ ەتىپ وتىر، - دەپ حابارلايدى Qamshy.kz kerek-info.kz -  كە سىلتەمە جاساپ.

مۇعالجار اۋدانى جاڭاجول اۋىلىنىڭ تۇرعىنى كۇدىكتىلەر تىزىمىنە كەزدەيسوق ىلىككەننەن بەرى ىنىسىمەن ەكەۋى ازاپ شەككەندىگىن ايتادى. ايتۋىنشا، ىزدەۋدە جۇرگەن تەرروريستەر قاتارىندا بولعانعاندىقتان، ەكى كوزى بىردەي كورۋدەن قالعان اناسىن ەمدەتۋ ءۇشىن شەتەلگە دە شىعا الماي وتىر.

-وسى وقيعاعا دەيىن 64 جاستاعى انامنىڭ دەنساۋلىعى جاقسى ەدى. مەنى جازىقسىز “تەرروريستەر تىزىمىنە” قوسقاننان كەيىن ەكى كوزى سۋ قاراڭعى بولىپ، كورمەي قالدى. ەمدەتۋ ءۇشىن ۋفاعا اپارۋىم كەرەك ەدى. الايدا كۇدىكتىلەر تىزىمىندە بولعاندىقتان، بارا المادىم. امالسىز، اناممەن بىرگە قۇداعايىمدى ەرتىپ جىبەردىم. ەندى قىتايعا اپارۋىم كەرەك. ءبىراق، ىزدەۋدە جۇرگەندىكتەن مەنى تاعى دا شەكارادان وتكىزبەۋى مۇمكىن. بۇل وتباسىمىز ءۇشىن اۋىر قايعى. جاقىندا قىزىم اقتوبەگە جەكە كۋالىك الۋ ءۇشىن سۋرەتكە تۇسۋگە بارعان. پوليسەيلەر “اكەڭ قۇتىلدى ما؟” دەپ سۇرايتىن كورىنەدى. بۇل قىزىم ءۇشىن قانشاما سوققى. بالام كوكشەتاۋدا اسكەري بورىشىن وتەپ جاتىر. ونىڭ تاعدىرى نە بولادى؟ - دەپ كۇيىنەدى سامات قوجانيازوۆ. 

ءوزىن لاڭكەستەر تىزىمىنەن كورگەن سامات قوجانيازوۆتىڭ ءىنىسى مەن جۇبايى وبلىستىق ىىد-نە كەلگەن. قۇقىق قورعاۋشىلاردان كەشىرىم سۇراۋىن تالاپ ەتىپتى. الايدا پوليسەيلەردەن ەكى ايدان بەرى حابار الماعان ەر ادام سوتقا جۇگىنۋگە ءماجبۇر بولعان.

-ەكى اي كۇتتىم. بىردە-بىر حابارلاسقان جوق، كەلمەدى دە. مەن قاراپايىم اداممىن. مەملەكەتكە، زاڭعا باعىنام. كەلىپ، كەشىرىم سۇراسا، قاتەلىكتەرىن مويىنداسا، ءىستى سوتقا جەتكىزبەيمىن دەپ ويلاعان ەدىم. 41 جاستاعى ءىنىم سانات تا “نۇر اقتوبەدەگى” اتىس كەزىندە قايتىس بولعانداردىڭ تىزىمىندە ءجۇر. جاقىندا ول اكەمىزگە تيەسىلى ديۆيدەنتى الۋ ءۇشىن اقتوبەدەگى قازپوشتاعا بارعان. ولار “سەندەر تەرروريستەر تىزىمىندە جۇرسىڭدەر . انىقتاما الۋ ءۇشىن استاناعا سۇرانىس جىبەرەمىز، كۇتىڭدەر” دەپ قايتارىپ جىبەرىپتى. قاتە كەتكەن شىعار. الماتىدا دا جاعداي ۋشىعىپ كەتتى. ءبارى تىنىشتالسىن دەدىم. ءبىراق، شىدامنىڭ دا شەگى بار. قانشا كۇتۋگە بولادى؟! جازىقسىز ايىپتاۋدان كەيىن جۇرەگىم كوتەرىلەدى. تەك دارىمەن جۇرەمىن. ولاردىڭ قولىما مەنىڭ تەررويستەرگە قاتىسىم جوقتىعىن انىقتايتىن جازباشا انىقتاما بەرۋىن تالاپ ەتەمىن، - دەيدى شاعىمدانۋشى. 

بۇدان بولەك سامات پەن سانات قوجانيازوۆ جەرگىلىكتى باسىلىمداردىڭ ءبىرىن دە سوتقا بەرگەن. ءاعالى-ىنىلى ەكەۋ وزدەرى شەككەن ار ازابى ءۇشىن ءارقايسىسىنان 10 ملن تەڭگە مورالدىق شىعىن ءوندىرىپ بەرۋدى تالاپ ەتۋدە. 

ەستەرىڭىزگە سالا كەتەلىك، 5 ماۋسىم كۇنى اقتوبەدە بولعان لاڭكەستىك وقيعادان كەيىن تەرروريستەر تىزىمىنەن قاتە شىققان. اعايىندى قوجانيازوۆتاردان بولەك اقتوبەلىك دانيار ۋايسوۆ تا ءوزىن ولتىرىلگەن سودىرلاردىڭ اراسىنان تاۋىپ العاندىعىن ايتقان ەدى.