بيىلعى وقۋ جىلى شىعىس قازاقستاندا ءبىرىنشى سىنىپقا بارعان بالالار 4% كوبەيىپ، سانى مەكتەپ ءبىتىرۋشى تۇلەكتەردەن ەكى ەسەگە ارتقان. بۇگىن، وبلىستاعى 664 كۇندىزگى ءبىلىم بەرۋ وردالارىندا سول بالالارعا العاشقى قوڭىراۋ سوعىلدى، - دەپ حابارلايدى شقو اقپاراتتىق ورتالىعى.

2016-2017 وقۋ جىلى باسىندا ايماقتا 664 كۇندىزگى جالپى ءبىلىم بەرۋ مەكتەپتەرى جۇمىس ىستەپ تۇر. ونىڭ 492 ورتا، 121 نەگىزگى جانە 51 باستاۋىش ءبىلىم وشاقتارى. ال، حالىق از شوعىرلانعان 382 ەلدى مەكەندەگى مەكتەپ جاسىنداعى 4 666 بالانىنىڭ مەكتەپكە قاتىناۋى ماسەلەسى دە نازاردان تىس قالمادى. بۇل بالالاردىڭ 80% كۇندەلىكتى مەكتەپكە تاسۋ ءۇشىن 175 اۆتوبۋس قاراستىرىلعان. 586 بالا مەكتەپ جانىنداعى ينتەرناتتاردى ءبىلىم الۋدا. ال، قالعان 282 شاكىرت تۋعان- تۋىستارىنىڭ ۇيىندە تۇرىپ وقيدى.

ءبىلىم كۇنى وبلىس باسشىلىعى مەكتەپتەردەگى العاشقى قوڭىراۋ سالتاناتىنا قاتىسىپ، وقۋ جىلىنا دايىندىعىن تەكسەردى. شقو اكىمىنىڭ ورىنباسارى جاقسىلىق ومار قالاداعى رەيتينگتىك №16 ورتا مەكتەپ پەن  وبلىستىق ماتەماتيكا، فيزيكا، ينفورماتيكا سالاسىنداعى دارىندى بالالارعا ارنالعان مامانداندىرىلعان №25 مەكتەپ-ليسەيىندە بولدى.

– مەكتەپ قاي كەزدە بولسىن، قاي قوعامدا بولسىن ەرەكشە ءبىلىم ورداسى بولىپ تابىلادى. مۇندا بالالار ساپالى ءبىلىم الۋ ءۇشىن كەلەدى. بۇل مەكتەپتەر بىلتىر جاقسى ءبىلىم كورسەتكىشىن كورسەتكەن. سەبەبى، سىزدەر، بولاشاقتا قازاقستاننىڭ بولاشاعى ءۇشىن قىزمەت ەتەتىن جانداردى تاربيەلەپ جاتىرسىزدار. سوندىقتان مەكتەپ ۇجىمىنا، ۇستازدارعا ءبىلىم بەرۋدە، تاربيە بەرۋدە بيىل دا بوساڭسۋعا بولمايدى،–  دەپ قاتاڭ تاپسىردى ءوز سوزىندە ج. ومار.

ايتا كەتۋ كەرەك، اعىمداعى جىلى وبلىستاعى ءبىلىم وردالارىنىڭ سانى تاعى بىرەۋگە ارتپاق.  كۋرچاتوۆ قالاسىندا ءۇش اۋىسىمدىق ءبىلىم بەرۋ ماسەلەسىن شەشۋ ماقساتىندا 600 ورىندىق جاڭا مەكتەپ جۋىردا پايدالانۋعا بەرىلەدى.