مەملەكەت باسشىسى نۇرسۇلتان نازاربايەۆتىڭ ايتۋىنشا، جەر رەفورماسى بويىنشا قوعامدىق كوميسسيانىڭ جۇمىسى بارىسىندا قوعام كوكەيىندە جۇرگەن كوپتەگەن ماسەلەلەر تالقىلاندى. وسىنىڭ ناتيجەسىندە قازىرگى زاڭنامانىڭ ءبىرقاتار كەمشىلىكتەرى انىقتالدى، - دەپ حابارلايدى Qamshy.kz Baq.kz – كە سىلتەمە جاساپ.

پرەزيدەنت جەر كودەسىنىڭ داۋ تۋدىرعان ءبىرقاتار نورمالارىنىڭ ءموراتورييىن تاعى بەس جىلعا، 2021 جىلدىڭ 31 جەلتوقسانىنا دەيىن ۇزارتقانىن تاعى ءبىر مارتە ەسكە سالدى.

"جەر رەفورماسى بويىنشا قۇرىلعان كوميسسيا ءبىراز شارۋا تىندىردى. قوعامنىڭ كوكەيىندە جۇرگەن پروبلەمالاردى تالقىلاپ، بۇعان دەيىن ەسكەرىلمەي كەلگەن كوپتەگەن كەمشىلىكتەردى انىقتادى. وسىعان بايلانىستى ءبىرقاتار ۇسىنىستار ازىرلەندى. سونىڭ بارلىعى بولەك ءبىر زاڭدا كورىنىس تاۋىپ، پارلامەنتتىڭ قاراۋىنا ەنگىزىلەدى. اتاپ ايتقاندا، اۋىل شارۋاشىلىعى جەرلەرىن تاراتۋ جۇيەسىن جەتىلدىرۋ، جەردى ۇتىمدى پايدالانۋدى باقىلاۋ جانە تاعىسىن تاعى. شىنى كەرەك، ءبىر قولعا جۇزدەگەن مىڭ گەكتار جەردى بىردەن بەرىپ تاستاۋعا بولمايدى. ءبىز وسىنى ەسكەرمەي كەلدىك. الەم بويىنشا ونداي تاجىريبە جوق. ءبىز بولساق، باس كەزىندە جەردى وڭدى-سولدى تاراتۋعا كىرىستىك. جەردى العان ءاربىر ادام وعان جاۋاپ بەرۋى كەرەك. جەر اۋىل شارۋاشىلىعى سالاسىندا تاجىريبەسى بار ازاماتتارعا بەرىلگەن ءجون. ونىڭ ءبىلىمى بار، تاجىريبەسى بار دەگەندەي. بىزدە بولسا، كىم كورىنگەننىڭ ءبارى جەردى الىپ الدى. ءقازىر ءبىز پروكۋراتۋرا ارقىلى ول جەرلەردى مەملەكەتكە قايتارىپ جاتىرمىز. سەبەبى وسى ۋاقىتقا دەيىن ول جەرلەردى قۋراي باسىپ كەتتى"، - دەپ اتاپ كورسەتتى ن.نازاربايەۆ پارلامەنت پالاتالارىنىڭ بىرلەسكەن وتىرىسىندا.

مەملەكەت باسشىسىنىڭ ايتۋىنشا، ۇكىمەت جەر كودەكسىنە وزگەرىستەر ەنگىزگەن كەزدە اۋىل شارۋىشىلىعى سالاسىنا قارجى تارتۋدى كوزدەدى. سەبەبى بۇگىندە وسى سالاعا قۇيىلىپ جاتقان بيۋدجەت اقشاسىنىڭ قايتارىمى تومەن بولىپ تۇر. قارىزدىڭ كولەمى ءوسىپ كەلەدى. كۇندەردىڭ كۇنىندە ونىڭ ءبارى "سابىن كوپىرشىكتەرى" سياقتى جارىلىپ، ەل ەكونوميكاسىن تىعىرىققا تىرەۋى ابدەن مۇمكىن.

"وسىنى الدىمەن ءتۇسىندىرۋ جۇمىستارىنان باستاپ، ارتىنان زاڭدى قابىلداعاندا جاعداي مۇلدەم باسقاشا بولاتىن ەدى. اگرارلىق سەكتورعا قاتىستى زاڭنامانى قابىلداعان كەزدە وسى ماسەلەلەردى بارىنشا ەسكەرۋ كەرەك"،-دەدى پرەزيدەنت