وتكەن جىلى مادەنيەت جانە سپورت ءمينيسترى ارىستانبەك مۇحامەدي ۇلى «لوتەرەيا جانە لوتەرەيا قىزمەتى تۋرالى» زاڭ جوباسىن تانىستىرعان بولاتىن. ونىڭ ىشىندە «ويىن بيزنەسى» تۋرالى زاڭ قابىلدانىپ جاتسا، بۋكمەكەرلىك كەڭسەلەر بالاباقشالار مەن جاتاقحانالاردان اۋلاق سالىناتىنىن دا ايتقان-دى.

بۋكمەكەرلىك كەڭسەلەر وسى ەكىنشى «ويىن بيزنەسى» تۋرالى زاڭ جوباسىندا قارالۋى ءتيىس بولعان.

الايدا، قازىرگى تاڭدا بۋكمەكەرلىك كەڭسەنى  قالانىڭ كەز كەلگەن جەرىنەن تابۋعا بولادى. ونى مادەنيەت جانە سپورت ءمينيستىرىڭ ءوزى دە راستاعان ەدى.

«ءقازىر بۋكمەكەرلىك كەڭسەلەر كەز كەلگە جەردە اشىلىپ جاتىر. ءتىپتى، بالاباقشا، مەكتەپتەردىڭ قاسىنان دا، ستۋدەنتتەردىڭ جاتاقحانالارىنا جاقىن ورىنداردا دا، تۇرعىن ۇيلەردىڭ استىنان دا اشىلىپ جاتىر» دەگەن مۇحامەدي ۇلى  ولار ءبىلىم نىساندارىنىڭ، جاتاقحانالاردىڭ جانىندا ەمەس، جەكە عيماراتتاردا اشىلۋى كەرەكتىگىن ايتقان بولاتىن.

ال، سونىمەن قاي قالانىڭ قاي تۇسىن الساڭىز دا بۋكمەكەرلىك كەڭسەلەردەن كوز اشا المايسىز. «ىزدەگەنگە سۇراعان» كوز الدىندا تۇراتىن كەڭسەلەرگە قازىرگى تاڭدا جاستار جاعى كوپتەپ «بايلانۋدا».

اتا-اناسىنىڭ جالعىز پەرزەنتى رۋسلاندى اتا-اجەسى «ەرتەرەك شوبەرە سۇيەمىز» دەپ 19 جاسىندا ۇيلەندىرگەن. ەرتە ۇيلەنگەن ەركە بالا وسى كەزدەن باستاپ ۇيدە كۇتىپ وتىرعان كەلىنشەگى، جولىنا قارايلاعان اتا-اجەسى مەن اكە-شەشەسى بارىن ۇمىتىپ،  بۋحمەكەرلىك كەڭسەلەردەن شىقپايتىن بولادى.

-سۇيگەن قىزى بار بولعان سوڭ، ءبىز دە ەرتەرەك قىزىقشىلىق كورەيىك دەپ ۇيلەندىردىك قوي. ال وعان وتباسىلىق ءومىر ەمەس، ءباس  تىگەتىن ويىندار قىزىق ەكەنىن الدىندا بىلمەپپىز. كادىمگىدەي بايلانىپ قالعان. ۇيگە قايتار جولدى ۇمىتادى. قايتەرىمىزدى بىلمەيىز، - دەيدى رۋسلاننىڭ اناسى.

بىلتىر عانا ۇيلەنىپ، ءۇي-جاي بولعان رۋسلاننىڭ كوزى تەك بۋكمەكەرلىك كەڭسەلەردى، ويىن اۆتوماتارى مەن قۇمار ويىنداردى عانا كورەتىن جاعدايعا جەتكەن. بۋكمەكەرلىك كەڭسەدە تىككەن ءباسى ءساتسىز شىعىپ، بار اقشاسىن ۇتتىرعان كۇنى اقىسىن كەلىنشەگى ايىمنان الادى.

-رۋسلان كوبىنە ۇتىلادى. ۇتىلعان كۇنى مەن تاياق جەيمىن. كوزدەرى قانعا تولىپ، قىزارىپ كەپ مەنى ۇرادى. بار اقىسىن مەنەن الادى. قوياتىن شىعار دەيمىن، جاس قوي دەيمىن. ءبىراق مەن دە بىرەۋدىڭ بالاسىمىن، مەن دە جاسپىن. نەگە ونىڭ تەنتەكتىگىنە كوز جۇمىپ قاراي بەرۋىم كەرەك. شارشادىم. وسى ءباس تىگەتىن ويىندارى شارشاتتى. ءبىز ءجۇرىپ جۇرگەندە وندايى جوق ەدى، كەيىن ءبىر دوستار تاۋىپ وسىلاي بوپ كەتتى. جۇمىستان دا شىعىپ قالدى. ۇتادى، ۇتىلادى. وسىدان اقشا تاۋىپ، وسىعان اقشا سالىپ جۇرەدى، - دەگەن كەلىنشەگى ايىم كۇيەۋىنىڭ وسى جولعا تۇسۋىنە زاڭدى بۇزعان بۋحمەكەرلىك كەڭسەلەردى دە ايىپتايدى.

-زاڭ بويىنشا 21 جاسقا تولماعان ادامدارعا بۋكمەكەردىك كەڭسەگە كىرۋگە بولمايدى. ءبىراق مەنىڭ كۇيەۋىم ءقازىر 20-دا، جاستايىنان بۋكمەكەرلىك كەڭسەلەردىڭ تۇراقتى كليەنتى. وسىعان جول بەرىپ، زاڭ بۇزىپ وتىرعان بۋكمەكەرلىك كەڭسەلەر ءبىر جاس وتباسىنىڭ شايقاۋىنا سەبەپ بولاتىنىن ويلاپ تا جاتپايدى. ولارعا اقشا بولسا بولدى، - دەيدى كەلىنشەك كوزىنىڭ جاسىن ءسۇرتىپ.

ايتا كەتەيىك، زاڭ بويىنشا راسىندا 21 جاسقا دەيىنگىلەرگە ءباس تىگۋگە تىيىم سالىنعان. زاڭ بۇزعاندارعا «اكىمشىلىك قۇقىق بۇزۋشىلىق تۋرالى» كودەكستىڭ 338-بابىنىڭ 2-بولىمىنە سايكەس 300 ايلىق ەسەپتىك كورسەتكىش (400 مىڭ تەڭگە) ايىپپۇل سالىنادى.

الايدا رۋسلاننىڭ جاعدايىن ەسكەرسەك، قالاداعى بۋكمەكەرلىك كەڭسەگە كەلۋشىلەردىڭ جاسىن سۇراپ، قاداعالاپ جاتقان ەشكىم جوعىن بايقاۋعا بولادى.

بۋحمەكەرلىك كەڭسەلەردە اسىرەسە الەمدىك دەڭگەيدەگى چەمپيوناتتار مەن وليمپيادالار بولعان كەزدە كەلۋشىلەر كوبەيەدى. جاس دەمەي، كارى دەمەي ءباس تىگەدى. ءباس تىگۋشىلەردىڭ كوپشىلىگى ستۋدەنتتەر ەكەنىنە قاراپ، 338-باپتىڭ بۇزۋىلۋى كوپتەپ كەزدەسەتىنىن جاسىرۋ مۇمكىن ەمەس.

بۋكمەكەرلىك كەڭسەلەردەن قوماقتى ۇتىس العان ادامداردىڭ بولاتىنى دا راس. ءبىراق ول نەكەن-ساياق. ەستەرىڭىزگە سالساق، 2012 جىلى فۋتبولدان ەۋروپا چەمپيوناتى كەزىندە 2 ميلليون تەڭگە تىگىپ، 5 ميلليون تەڭگە ۇتىس العان الماتىلىق تۋرالى جاڭالىق جەر-جەرگە تاراعان ەدى.

دەگەنمەن، كۇندەلىكتى تاپقانى اس-سۋىنان ارتىلمايتىن ازاماتتاردىڭ بۋكمەكەرلىك كەڭسەگە «بايلانىپ» جاتقانى قوعامنىڭ نەگىزگى ماسەلەسىنىڭ بىرىنە اينالدى.

ال رۋسلاننىڭ وتباسى جوعارىدا اتالعان زاڭ جوباسى ءالى دە بولسا قارالىپ، قولدانىسقا ەنگىزىلسە، تالاپ كۇشەيسە ەكەن دەگەن ويلارىمەن ءبولىستى.

ينديرا قۋات