بۇۇ-نىڭ قاۋىپسىزدىك جونىندەگى كەڭەسىندە باس حاتشىنى سايلاۋ جونىندەگى داۋىس بەرۋ كەزەڭى وتكىزىلەدى. بۇل شارا رەسەي فەدەراسياسىنىڭ ۇيىمداعى تۇراقتى وكىلى ۆيتاليي چۋركيننىڭ جەتەكشىلىگىمەن وتەدى. داۋىس بەرۋدىڭ ءتورتىنشى كەزەڭى 9 قىركۇيەككە جوسپارلانعان. بەسىنشىسى 26 قىركۇيەكتە بولادى.  ودان كەيىنگى داۋىس بەرۋ كەزەڭى قازان ايىنىڭ العاشقى اپتاسىنا بەلگىلەنگەن.

«بۇل تۋرالى بۇۇنىڭ قاۋىپسىزدىك كەڭەسىنىڭ باسشىسى، جاڭا زەلانديانىڭ ۇيىمداعى تۇراقتى وكىلى دجەرارد ۆان بوحەمان حابارلادى» دەپ جازادى، بۇۇ-نىڭ «جاڭالىقتار ورتالىعى». 1 قىركۇيەكتەن باستاپ جاڭا زەلانديا كەڭەستىڭ باسشىسى بوپ بەكىتىلدى. دجەرارد ۆان بوحەمەن جۋرناليستەردى كەڭەستىڭ قىركۇيەك ايىنا بەلگىلەنگەن جوسپارىمەن تانىستىردى. بۇل ايداعى ەڭ باستى وقيعالار: 21 قىركۇيەككە بەلگىلەنگەن كەڭەس مۇشەلەرىنىڭ وڭتۇستىك سۋدانعا ساپارى جانە باس حاتشىنى سايلاۋ كەزەڭى.

بولاشاق باس حاتشىنى تاڭداۋ رەيتينگىسى بويىنشا ءسوز سويلەگەن جاڭا زەلانديا ەلشىسى  داۋىس بەرۋ بارلىق ەرەجەلەرگە ساي وتەتىنىن ايتتى. داۋىس بەرۋ جابىق ەسىك جاعدايىندا وتپەك. بەس تۇراقتى جانە ون تۇراقتى ەمەس كەڭەس مۇشەسىنە داۋىس بەرۋ ءۇشىن بىردەي تۇسكە يە بيۋللەتەندەر بەرىلمەك. ال قازان ايىنداعى داۋىس بەرۋدە كەڭەستىڭ تۇراقتى مۇشەلەرى مەن تۇراقتى ەمەس مۇشەلەرىنە بەرىلەتىن بيۋللەتەندەر ءارتۇرلى بولادى. جاڭا زەلانديانىڭ بۇۇ-داعى تۇراقتى وكىلىنىڭ ايتۋىنشا، قىركۇيەك ايىندا ونىڭ ورنىنا داۋىس بەرۋدى رەسەيدىڭ تۇراقتى  وكىلى ۆيتاليي چۋركين وتكىزەدى.

«بۇۇ-نىڭ باس حاتشىسى لاۋازىمىنا جاڭا زەلانديادان ۇمىتكەر قاتىساتىندىقتان مەن قىركۇيەك ايىنداعى داۋىس بەرۋ شاراسىنا جەتەكشىلىك جاسامايمىن» دەدى، دجەرارد ۆان بوحەمەن.

قازىرگى تاڭدا  بۇۇ-نىڭ باس حاتشىسى لاۋازىمىنا 10 ۇمىتكەر تىركەلگەن. ولاردىڭ التاۋى شىعىس ەۋروپادان: بۇرىنعى يۋگوسلاۆيالىق ماكەدونيا رەسپۋبليكاسىنان سردجيان كەريم، سلوۆەنييادان دانيلو تيۋرك، بولگاريادان يرينا بوكوۆا، مولدوۆا رەسپۋبليكاسىنان ناتاليا گەرمان،  سەربيادان ۆۋك ەرەميچ، سلوۆاكيادان ميروسلاۆ لايچاك. سونداي-اق بۇل لاۋازىمنان انتونيۋ گۋتەرريش  (پورتۋگاليا) تە ۇمىتكەر بوپ وتىر. جاڭا زەلانديالىق حەلەن كلارك، ارگەنتينالىق سۋسانا مالكوررا جانە كوستا-ريكا وكىلى كريستيانا فيگەرەس  دە سايلاۋعا قاتىسپاق.

بۇۇ-نىڭ جارعىسىنا سايكەس باس حاتشىنى قاۋىپسىزدىك كەڭەسىنىڭ ۇسىنىسىمەن باس اسسامبلەيا تاعايىندايدى. جەتپىس جىل ىشىندە ۇيىمعا سەگىز باس حاتشى جەتەكشىلىك ەتكەن. داۋىس بەرۋ كەزەڭدەرى كەڭەستىڭ بارلىق 15 مۇشەسى ءبىر شەشىمگە كەلگەنشە نەمەسە ءبىر ۇمىتكەرگە كەڭەس مۇشەلەرىنىڭ باسىم بولىگى داۋىس بەرگەنشە جالعاسادى.

ەستەرىڭىزگە سالايىق، پان گي مۋن — ۇيىم تاريحىنداعى سەگىزىنشى باس حاتشى. ول كوفي انناننىڭ ورنىن باسقان، وسى لاۋازىمعا تاعايىندالعان جالعىز ازيالىق ازامات. كوفي اننانعا دەيىن باس حاتشى قىزمەتىن 
بۋتروس بۋتروس-گالي (1992-1996)، حاۆەر پەرەس دە كۋەليار (1982-1991)، كۋرت ۆالدحايم (1972-1981)، ۋ تان (1961-1971)، داگ حاممارشەلد (1953-1961)  تريۋگۆە لي (1946-1952) اتقارعان.

ساراپشىلاردىڭ پىكىرىنشە، بۇۇ-نىڭ باس حاتشىسى لاۋازىمىنا شىعىس ەۋروپالىق وكىل سايلانۋى مۇمكىن.

شارافات جىلقىبايەۆا