كاسىپقوي بوكسشى قانات يسلامنىڭ قارسىلاسى بەلگىلى بولدى، - دەپ حابارلايدى Qamshy.kz «جاس قازاققا» سىلتەمە جاساپ.

ورتا جەڭىل سالماق بويىنشا كاريب ايماعىنىڭ ۇزدىگى، WBA FedeCaribe تۇجىرىمىنىڭ چەمپيونى وتانداسىمىز كاسىپقوي بوكسشى قانات يسلام 29 قازاندا الماتى قالاسىندا ءوزىنىڭ 22- كەزدەسۋىن وتكىزەدى.

قارسىلاسى گانالىق پاتريك اللوتەي(Patrick Allotey). كاسىپقوي بوكستا «ۋلى جەبە» لاقاپ اتىمەن تانىلعان بوكسشى وسى ۋاقىتقا دەيىن 36 كەزدەسۋ وتكىزگەن. 2 رەت جەڭىلىپ، 34 جەكپە-جەگىندە جەڭىسكە جەتكەن. 24 كەزدەسۋىندە قارسىلاسىن نوكاۋتپەن ۇتقان.

سوققىسى جويقىن، تاجىريبەلى پاتريك اللوتەيمەن قانات يسلام WBA (Interim) تۇجىرىمى بويىنشا الەم چەمپيونى اتاعى ءۇشىن جۇدىرىقتاسادى. بۇل كەزدەسۋ وسى جىلدىڭ ايتۋلى وقيعاسى بولماق. جەكپە-جەك الماتى قالاسىندا «Almaty arena» سپورت كەشەنىندە وتەدى. باس دەمەۋشى «ZHERSU» كورپوراسياسى. 

وتانداسىمىز كاسىپقوي بوكسشى قانات يسلام وسى ۋاقىتقا دەيىن 21 كەزدەسۋ وتكىزىپ، بارىندە جەڭىسكە جەتكەن. ونىڭ 18ء-ىن نوكاۋتپەن ۇتقان. لاقاپ اتى «قازاق». بوكس كەشىندە باسقا دا قازاقستاندىق كاسىپقوي بوكسشىلار جۇدىرىقتاسادى دەپ جوسپارلانۋدا. بوكس كەشىنىڭ بيلەتتەرى جاقىندا ساتىلىمعا شىعادى.