بيىلعى جىلدىڭ كوكتەمىندە ۆەتنامداعى «جىلاندار سيركىنىڭ» قۇرىلعانىنا ءبىر جىل تولدى. نادجيا ابدراحمانوۆا ەسىمدى قازاقتىڭ قايسار قىزى نەگىزىن قالاعان «جىلاندار سيركى» الەمدەگى تەڭدەسى جوق بىرەگەي جوبا.
نادجيا ابدراحمانوۆا كەڭەس ۇكىمەتىنىڭ تارقار تۇسىندا مەكتەپ تابالدىرىعىن اتتاپ، الماتىداعى از ساندى قازاق مەكتەبىنىڭ بىرىندە ءبىلىم العان. اعىلشىن ءتىلىن اۆسترالياداعى سيدنەي قالاسىندا وقىعان.
ءومىر جولىندا كاسىپ پەن ماماندىقتىڭ بىرنەشە ءتۇرىن الماستىرعان قۇربىمىز 2014 جىلى ءبارىن تاستاپ، ءوزىنىڭ جان قالاۋىمەن اينالىسۋعا بەت بۇرادى. ونىڭ جان قالاۋى ەشكىمگە ۇقساماۋ جانە وزگە ەشكىم جۇرمەگەن وزىندىك سارا جولىن تابۋ ەدى. ءسويتىپ الماتىدا ءبىراز ۋاقىت جۇمىسسىز جۇرگەن ول وڭتۇستىك شىعىس ازياداعى تابيعاتى ەرەكشە ۆەتنامعا ساپار شەگەدى.
نادجيانىڭ بۇل ەلدە ەشبىر تانىسى نە دوسى جوق ەدى. بەيتانىس ەلدە باستاپقىدا دۇكەنشى بولىپ جۇمىس ىستەگەن قازاق قىزى تاۋارلار الەمىنەن جالىعا باستايدى. 2015 جىلى جاڭا تانىسقان جەرگىلىكتى دوستارىمەن بىرلەسىپ، «جىلاندار سيركىن» اشۋدى ۇيعارادى.
دۇكەندەگى ءىسىن تاستاعان نادجيا بىرنەشە ءتۇرلى جىلانداردى باعاتىن فەرمانى دا قۇرادى. قاراماعىنا «جىلان ارباۋشى» مامانداردى جۇمىسقا الادى.
بۇگىندە نادجيا ابدراحمانوۆا باسقاراتىن «جىلاندار سيركىندە» ەلۋ ادام جۇمىس ىستەيدى.
«جىلاندار سيركىنە» تەك ۆەتنامدىقتار عانا ەمەس، شەت ەلدىكتەر دە كوپ كەلەدى. تۋريستەردى كوپ قىزىقتىراتىنى — جىلان ونەرىن تاماشالاۋدان ءلاززات الۋ، جىلاندى سيپاۋ ارقىلى كەيبىر اۋرۋ تۇرىنەن ايىعۋدى كوزدەيتىندەرى دە بار.
«وتكەنىمە قاراسام، قىسقا مەرزىمدە تالاي اسۋدى ارتقا تاستاعانىمدى بايقادىم. ءبىراق ءدال قازىرگى ۋاقىتتا وتباسىنان گورى جۇمىسىم مەن ءۇشىن ماڭىزدىراق بولىپ تۇر. الدا تالاي جوسپار، كوپتەگەن ماقساتتار كۇتىپ تۇر. سوندىقتان مەنىڭ دەمالۋعا دا، ءبىر ساتكە تەجەلۋگە دە ۋاقىتىم جوق»، — دەيدى نادجيا.
شارافات جىلقىبايەۆا
