سيرياداعى كومەك كورسەتەتىن ونداعان توپ بۇۇ-مەن بىرگە جۇمىس ىستەۋدى توقتاتاتىنىن، سەبەبى ۇيىمنىڭ ءبىرقاتار اگەنتتىكتەرى مەن سەرىكتەستەرى پرەزيدەنت باشار اساد بيلىگىنىڭ "ىقپالىندا ەكەنىن" مالىمدەدى،- دەپ حابارلايدى Qamshy.kz  ازاتتىققا سىلتەمە جاساپ.

بۇۇ-نىڭ گۋمانيتارلىق ماسەلەلەردى ۇيلەستىرۋ باسقارماسىنا جىبەرىلگەن حاتقا بارلىعى 73 توپتىڭ وكىلدەرى قول قويعان. ولار سونىمەن قاتار سيرياداعى بۇۇ اگەنتتىكتەرىنىڭ جۇمىسىنا تەكسەرۋ جۇرگىزۋدى دە تالاپ ەتەدى.

حاتقا قول قويعان ۇيىمدار اراسىندا سيريا-امەريكا مەديسينا قاۋىمداستىعى، "اق كاسكالار" دەگەن اتاۋمەن دە بەلگىلى، كوتەرىلىسشىلەر باقىلاۋىنداعى تەرريتوريالاردا جۇمىس ىستەيتىن "سيريا ازاماتتىق قورعانىسى" ۇيىمى بار. بۇۇ وكىلى ستەفان دۋياريچ ايىپتاۋ مەن بۇۇ-نىڭ كەيبىر اگەنتتىكتەرى سيريا رەجيمىمەن جۇمىس ىستەسەدى دەگەن تۇجىرىمدى تەرىستەدى.

ال سيريادا ۇكىمەت اسكەرى مەن ولاردىڭ وداقتاستارى كوتەرىلىسشىلەر باقىلاۋىنداعى الەپپودا جاڭا تەرريتوريالاردى قايتارىپ، قالانى قورشاۋدى كۇشەيتتى. التىنشى جىلعا سوزىلعان سيرياداعى سوعىستا 290 مىڭ ادام قازا تاپتى. حالىقارالىق قاۋىمداستىقتىڭ قاقتىعىستى توقتاتۋ جايىنداعى ارەكەتتەرىنەن ازىرگە ناتيجە جوق.