اقش-تىڭ قازرگى پرەزيدەنتى باراك وباما دونالد ترامپتى شاتاق مىنەزدى ءارى تالاي دۇنيەدەن حابارسىز دەگەن باعا بەردى. دونالد ترامپتىڭ ەل باسشىعا لايىق قابىلەتكە يە ەمەستىگى تۋرالى وباما لاوستا جۇرگەندە ايتقان. بۇل تۋرالى BBC حابارلايدى.
«مەن بۇل كىسىنى اقش پرەزيدەنتى بولاتىنداي قاسيەتتەرگە يە دەپ ويلامايمىن. ونىڭ ءاربىر مالىمدەمەسى مەنىڭ باعامنىڭ دۇرىس ەكەندىگىن دالەلدەيدى» دەدى وباما.
پرەزيدەنت بولۋ، ونىڭ ىشىندە شەت ەل باسشىلارىمەن كەزدەسۋ وڭاي شارۋا ەمەستىگىن ايتقان وباما «سەن نە ايتىپ تۇرعانىڭدى ءبىلۋىڭ كەرەك. الدىن الا دايىندالىپ، «ءۇي جۇمىسىن» جاساۋىڭ كەرەك. سويلەگەندە سەنىڭ ءسوزىڭ جۇزەگە اساتىن مۇقيات ويلاستىرعان ساياساتتى تانىتۋى كەرەك» دەدى وباما.
ەستەرىڭىزگە سالايىق، رەسپۋبلكيالىق پارتيا اتىنان اقش پرەزيدەنتتىگىنەن ۇمىتكەر بوپ وتىرعان دونالد ترامپ سايلاۋدا جەڭگەن جاعدايدا رەسەيمەن جانە ونىڭ پرەزيدەنتى ۆلاديمير پۋتينمەن وتە جاقسى قاتىناس ورناتاتىنىن مالىمدەگەن بولاتىن.
