وقۋ جىلى باستالۋىنا ءبىر اپتا قالعاندا كۇرد جۇمىسشىلار پارتياسىمەن بايلانىسى بار دەگەن كۇدىكپەن ەلدەگى 11 مىڭنان استام ءمۇعالىم قىزمەتىنەن كەتتى. بۇل كورسەتكىش 14 مىڭعا جەتۋى مۇمكىن. بۇل تۋرالى ۆۆس حابارلايدى.

قازرىگى تاڭدا 11285 ۇستاز ءماجبۇرلى تۇردەگى اقىلى دەمالىسقا شىعارىلعان. «انادولۋ» اقپارات اگەنتتىگىنىڭ مالىمەتىنە سۇيەنسەك، قىزمەتتەن قۋىلعان مۇعالىمدەرگە سەپاراتيستىك تەررورلىق ۇيىمدارمەن بايلانىسى بار دەگەن ايىپ تاعىلۋدا.

تۇركيادا بارلىعى 850 مىڭداي ءمۇعالىم بار. مۇعالىمدەر ەلدىڭ ناقتى قاي ايماقتارىندا قىسقارتۋعا ۇشىراعانى بەلگىسىز. كۇردتەر نەگىزىنەن تۇركيانىڭ وڭتۇستىك-شىعىس وڭىرىندە، سيريا، يراك جانە يرانمەن شەكارالاس اۋدانداردا تۇرادى.

15 شىلدەدەگى توڭكەرىس ارەكەتىنەن كەيىن ەل ۇكىمەتى اۋقىمدى تازارتۋ جۇمىستارىن باستاعانى بەلگىلى. 80 مىڭنان استام ادام، ونىڭ ىشىندە اسكەريلەر، جۋرناليستەر، سۋديالار، دەكاندار، فەتحۋللاح گيۋلەنمەن بايلانىستى دەگەن جالامەن جۇمىسسىز قالدى. سول كەزدە تۇركيانىڭ جوعارى ءبىلىم جونىندەگى باسقارماسى ۋنيۆەرسيتەتتەردەگى 1577 دەكاندى قىزمەتىنەن كەتىرۋدى تالاپ ەتكەن ەدى.