شىعىس قازاقستان وبلىسىنىڭ ءۇرجار اۋدانىندا «ءباتۋا» جاۋاپكەرشىلىگى شەكتەۋلى سەرىكتەستىگى 2011 جىلى رەسپۋبليكا بويىنشا قايتالانباس ءارى جالعىز پلاستيكالىق PVC قۇبىر شىعاراتىن زاۋىتتىڭ قۇرىلىسىن باستاپتى. سەرىكتەستىك تاراتقان اقپارات بويىنشا زاۋىت قۇرىلىسىنا 2011-2014 جىلدار اراسىندا، ياعني ءۇش جىلدا 6 ملرد. تەڭگە وتاندىق (ينۆەستيسيا مەملەكەت تاراپىنان سالىندى ما، بانكتەن نەسيە الدى ما، الدە جەكە ادامدار قارجى قۇيدى ما بەلگىسىز)، 3،5 ملرد. تەڭگەدەن اسا شەت ەلدىك ينۆەستيسيا تارتىلادى. زاۋىتتا 200-دەن اسا جۇمىس ورنى اشىلادى. 

بۇعان قوسا زاۋىتتىڭ جۇمىسىن قولداۋ ماقساتىندا 2015 جىلى «بيزنەستىڭ جول كارتاسى-2020» باعدارلاماسى اياسىندا «ءباتۋا» ج ش س ەلەكتر قۋاتىمەن قامتاماسىز ەتۋ ءۇشىن   ۆل-35 كۆ. قۋاتتى پس 35/10 كۆ ەلەكتر ستانسياسىن سالۋ ءۇشىن 387 ملن. تەڭگە بولەدى. بۇل قارجى تولىق يگەرىلگەن كەزدە قوسىمشا 73 جۇمىس ورنى اشىلۋى ءتيىس بولعان.

قۇرىلىسىنا 10 ملرد. تەڭگەگە جۋىق ينۆەستيسيالىق قارجى قۇيىلعان، 273  جۇمىسشىسى بار  ەلىمىزدەگى جالعىز زاۋىت ءوز ونىمدەرىن شىعارىپ، پايداعا كەنەلىپ، ەلدىڭ ءبارىن قارىق قىلىپ وتىرۋى كەرەك ەدى.

الايدا، وكىنىشكە قاراي «الاش جولى» حالىقتىق قوزعالىسى مۇشەلەرى انىقتاعانداي كەزىندە وبلىس اكىمدەرى ءاربىر ەسەبىندە ايرىقشا اتاپ ءوتىپ، شىعىس قازاقستانداعى بولاشاعىنان زور ءۇمىت كۇتتىرگەن ەڭ ءىرى ينۆەستيسيالىق جوبانىڭ سوڭى ءدال ءبىز ويلاعانداي بولماي شىقتى.

ارنايى ساپارمەن بارىپ، «ءباتۋا» ج ش س اتاقتى زاۋىتىن كورىپ قايتۋدىڭ ءساتى ءتۇستى. ءوز كوزىمىزبەن كورگەن جانە تۇسىرىلگەن فوتو-ۆيدەو ماتەريالدارعا قاراساق 10 ملرد. تەڭگەدەن اسا قاراجات جۇمسالعان زاۋىتتىڭ ورنىندا ءبىر وتار قويدىڭ قوراسىنداي عانا قۇرىلىس نىسانىن بايقادىق. ول قۇرىلىس عيماراتىنىڭ ىشىندە قانشالىقتى قۇندى، ميللياردتتاعان تەڭگە تۇراتىن قۇرال-جابدىقتاردىڭ تۇرعانىن انىقتاۋ مۇمكىن بولمادى، ءبىراق زاۋىتتىڭ كوپ جىلدان-اق جۇمىس ىستەمەي تۇرعانىن بىردەن اڭعارۋعا بولادى.

جان-جاعى قورشالماعان، اۋماعىن ءشوپ باسقان، ءبىر دە ءبىر كۇزەت تە، جۇمىسشى دا جوق شاعىن عانا زاۋىت عيماراتىنا، قاڭىراپ بوس جاتقان جەرگە قاراپ بۇل زاۋىت قۇرىلىسىنا ونداعان ميلليارد تەڭگە جۇمسالعانىنا سەنۋ اسا قيىن-اق. ونى ارينە ءتيىستى ورگاندار تەكسەرىپ، اق-قاراسىن اجىراتا جاتار، الايدا شىعىس قازاقستان وبلىسىنىڭ بۇرىنعى اكىمى بەردىبەك ساپاربايەۆ ءوزىنىڭ بىرنەشە بايانداماسىندا ايرىقشا اتاپ ءوتىپ، «وبلىستاعى ەڭ ءىرى ينۆەستيسيالىق جوبا» دەپ كورسەتكەن،  قازىرگى وبلىس باسشىسى دانيال احمەتوۆ 387 ملن. تەڭگە كولەمىندە كومەك قولىن سوزعان زاۋىتتىڭ وسىلاي قاڭىراپ، اۋماعى قوقىسقا تولىپ جاتقانى، 273 تۇگىلى 2 ادامنىڭ دا جۇمىسپەن قامتىلماعانى ارينە وكىنىشتى-اق.

ەڭ نەگىزگىسى،  6 ملرد. تەڭگە وتاندىق، 3،5 ملرد. تەڭگە شەتەلدىك ينۆەستيسيا قايدا كەتتى؟ ونى زاۋىت قۇرىلىسىنا سالعاندار زاۋىتتىڭ جۇمىس ىستەمەي تۇرعانىنا نەگە الاڭدامايدى؟ 2015 جىلى مەملەكەتتەن بەرىلگەن  387 ملن. تەڭگە قالاي يگەرىلدى؟

وسى سۇراقتىڭ بارىنە شىعىس قازاقستان وبلىسى اكىمىنەن، وبلىستىق پروكۋراتۋرادان، ينۆەستيسيا جانە دامۋ مينيسترلىگىنەن جاۋاپ كۇتەمىز.    

ءبىر وبلىستىڭ ءبىر اۋدانىنداعى ءبىر سەرىكتەستىكتىڭ ارەكەتى وسىنداي بولسا جالپى رەسپۋبليكا بويىنشا جاعدايدى ەلەستەتۋدىڭ ءوزى قيىن. وسىدان بارىپ قازاقستانداعى بيزنەستىڭ نەگە دامىماي جاتقانىن، جۇمىسسىزدىقتىڭ نەگە ارتىپ بارا جاتقانىن، حالىقتىڭ الەۋمەتتىك جاعدايىنىڭ نەگە ناشارلاپ بارا جاتقانىن اڭعارۋعا بولادى دەپ ويلايمىن.

جالپى باسقا وبلىستا دا وسىنداي جاعدايلاردىڭ ورىن الۋى ابدەن مۇمكىن. ونداعان، ءتىپتى جۇزدەگەن ميلليارد تەڭگە جۇمسالىپ، قاڭىراپ تۇرعان زاۋىتتار مەن فابريكالار تۋرالى اقپاراتتارىڭىز بولسا اقپارات قۇرالدارىندا، الەۋمەتتىك جەلىلەردە جاريالاڭىزدار نەمەسە «الاش جولى» حالىقتىق قوزعالىسىنا اقپارات بەرىڭىزدەر، اعايىن.

ايدىن ەگەۋبايەۆ،

«الاش جولى» قوزعالىسىنىڭ بەلسەندىسى

استانا-سەمەي-ۇرجار-استانا