مەملەكەت باسشىسى نۇرسۇلتان نازاربايەۆ يسلام كاريموۆتىڭ بەيىتىنە گۇل شوقتارىن قويدى، - دەپ حابارلايدى Qamshy.kz اقوردانىڭ باسپا ءسوز قىزمەتىنە سىلتەمە جاساپ.
مەملەكەت باسشىسى جينالعاندارعا ارناعان سوزىندە يسلام كاريموۆپەن ەكەۋىن ۇزاق جىلدار بويى بەرىك دوستىق، شىنايى تۇسىنىستىك، ءوزارا تىلەۋلەستىك بايلانىستىرىپ كەلگەنىن ايتتى.
– وزبەكستاندىقتاردىڭ كەلەر ۇرپاعى، مەملەكەت قىزمەتىندەگى باسشىلاردىڭ كەلەسى بۋىنى يسلام كاريموۆتى ءاردايىم ەستە ساقتايدى دەپ سەنەمىن. ونىڭ ارتتا قالعان مول مۇراسىن، مەملەكەتتىك قىزمەتىنىڭ ناتيجەلەرىن ۇرپاق زەرتتەپ-زەردەلەپ، اتقارعان ىستەرىن وزبەك حالقىنىڭ تاريحىنا التىن ارىپتەرمەن جازادى. ول بۇكىل الەمگە تانىمال كوشباسشى بولدى، ەل ەكونوميكاسىنىڭ قالىپتاسۋى مەن دامۋى، حالىقتىڭ ءال-اۋقاتىنىڭ ارتۋى ونىڭ ەسىمىمەن بايلانىستى. ءبىز ۇلى ادامنان ايىرىلدىق، – دەدى قازاقستان پرەزيدەنتى.
سونداي-اق، نۇرسۇلتان نازاربايەۆ باۋىرلاس ەلدەرىمىز اراسىنداعى تاريحي جانە ستراتەگيالىق بايلانىستى نىعايتۋ جولىندا وزبەكستاننىڭ تۇڭعىش پرەزيدەنتى باعا جەتپەس ءرول اتقارعانىنا توقتالدى.
– قازاق پەن وزبەك حالقى ءاردايىم بىر-بىرىمەن ەتەنە جاقىن بولدى. يسلام ابدۋگانييەۆيچ ەكەۋمىز 1998 جىلى قوجا احمەت ياساۋي كەسەنەسى باسىندا ماڭگىلىك دوستىق تۋرالى كەلىسىمگە قول قويدىق، ءبىزدىڭ قارىم-قاتىناسىمىز ۇنەمى سول كەلىسىمگە نەگىزدەلدى. قازاقستان ءارقاشان وزبەك حالقىمەن قاناتتاسىپ، قاتار كەلەدى جانە سولاي بولا بەرەدى. ءبىز سىزدەرمەن بارلىق قۋانىشتى بىرگە ءبولىسىپ، قيىن كەزدەردە بىرگە قايعىرامىز، – دەدى مەملەكەت باسشىسى.
سونداي-اق، نۇرسۇلتان نازاربايەۆ ي.كاريموۆتىڭ وتباسىمەن كەزدەسىپ، قازاقستان حالقىنىڭ جانە جەكە ءوزىنىڭ اتىنان شىن نيەتىمەن كوڭىل ايتتى.
ەستەرىڭىزگە سالساق، بۇگىن نۇرسۇلتان نازاربايەۆ سامارقان قالاسىنا بارعان بولاتىن.
