ەءرلى-زايىپتى جۋرناليستەر مارات توقاشبايەۆ پەن راۋشان كارشالوۆانىڭ «باقىتتىڭ كىلتى» اتتى كىتابى جارىق كوردى. كىتاپ وتباسىلىق قۇندىلىقتاردى ناسيحاتتاۋعا ارنالعان. بۇگىنگى ەلەكترونيكا عاسىرىندا ءومىر ءسۇرۋ جەڭىل ءتارىزدى كورىنگەنىمەن باقىتتى وتباسىن قۇرۋ وڭاي ەمەس. تىرشىلىكتىڭ شىم-شىتىرىق بۇرالاڭدارىنان اداسپاي ءوتىپ، ءوز جۇبىڭدى تابۋ، تاعدىرىڭدى تاپسىرعان اداممەن ءتىل تابىسۋ تەك يمان مەن ءتوزىمنىڭ، اقىل مەن سابىردىڭ ارقاسىندا عانا مۇمكىن.
جازۋشى-جۋرناليست مارات توقاشبايەۆ قازاقستان پەداگوگيكالىق اكادەمياسىنىڭ اكادەميگى، پروفەسسور، رەسپۋبليكالىق قوعامدىق-ساياسي «پرەزيدەنت جانە حالىق» گازەتىنىڭ باس رەداكتورى بولسا، قالامگەردىڭ جۇبايى راۋشان كارشالوۆا – «قازاقستان پاتريوتى» جۋرنالىنىڭ باس رەداكتورى، قازاقستان جۋرناليستەر وداعى سىيلىعىنىڭ لاۋرەاتى.
جۋرناليستەردىڭ ءوزارا سۇقباتى تۇرىندە بەرىلگەن پىكىر الماسۋلار وتباسىلىق ءومىردىڭ الۋان اسپەكتىلەرىن، ەرلى-زايىپتىلاردىڭ وتباسىنداعى مىندەتتەرىن، وندا سابىر مەن يماندىلىقتىڭ الار ورنىن تالقىلايدى. «شاڭىراق شىرايىنىڭ شارتتارى» بولىمىندە «ەرلى-زايىپتىلاردىڭ سويلەسۋ مادەنيەتى»، «ەرىن سىيلاعان ەسىكتە قالمايدى»، «قىزعانىشتىڭ ەمى» ءتارىزدى تاقىرىپتار جۇرتشىلىقتىڭ كوكەيىندەگى كوپتەگەن سۇراقتارىنا جاۋاپ بەرەدى.
«ءداستۇرىمىزدى دارىپتەسەك» بولىمىندە قۇدالىققا كىمدەر باراتىنى، قورجىندى كىمدەر اشاتىنى، «ءولى-تىرى» اپارۋدىڭ سىرلارى، ابىسىندار ينستيتۋتى، ەنە مەن كەلىن ينستيتۋتى تۋرالى وتە قۇندى دەرەكتەر بەرىلگەن.
كىتاپتىڭ كەلەسى ءبىر بولىگى قازاق حالقىنىڭ ادەت-عۇرىپتارىن، سالت-داستۇرلەرىن ناسيحاتتاۋعا ارنالعان. ونداعى قاتەلەستىرمەيتىن قاعيدالار جاس جۇبايلارعا تاپتىرماس اقىلشى بولماق. «باقىتتىڭ كىلتى» كىتابى شاڭىراق قۇرۋدى ويلاستىرىپ جۇرگەن قىز-جىگىتكە عانا ەمەس، ۇيلەنگەندەرىنە كوپ جىل بولعان قوساقتارعا دا كادىمگىدەي وي سالارلىق دۇنيە.
